Njohësi i sigurisë, Fatmir Çollaku, ka kritikuar qasjen e Bashkimit Evropian ndaj Kosovës dhe Serbisë, duke e cilësuar atë si të pabarabartë. Në emisionin “Ditari” në Tëvë1, ai ka komentuar edhe prezencën e Milan Radoiçiqit në një tubim të ish-presidentit serb Aleksandar Vuçiq, ku, sipas raportimeve, ishte i pranishëm edhe djali i tij.
Çollaku ka thënë se, sipas tij, Bashkimi Evropian ka ndjekur politika me standarde të dyfishta, duke ushtruar presion ndaj Kosovës, ndërsa Serbia, sipas tij, nuk është përballur me të njëjtin nivel të trysnisë.
“Fatkeqësisht, duhet të themi atë që e dimë të gjithë: BE-ja ka pasur një qasje krejt ndryshe ndaj Kosovës dhe krejt ndryshe ndaj Serbisë, në favor të Serbisë. Ka vepruar me standarde të dyfishta. Nëse kthehemi pak kohë më herët, kur ne kishim sanksione, neve na vunë sanksione ekonomike, ndërsa Serbia, si një fëmijë i llastuar, në të gjitha etapat e proceseve dhe dialogut që po zgjasin, është përkëdhelur. Ngjashëm po vazhdohet edhe tani me një qasje të tillë”, ka deklaruar Çollaku në Tëvë1.
Ai e ka përmendur edhe rastin e Banjskës, duke theksuar se, sipas tij, Serbia nuk ka ushtruar masa të mjaftueshme ndaj Radoiçiqit, pavarësisht rolit të tij në këtë rast.
“Nuk ka nevojë të kemi shumë argumente, e kemi një argument të vetëm: rastin e Banjskës. Pranimi i fajësisë nga Radoiçiqi për një vepër të tillë, e cila është vepër terroriste, dhe asgjë nuk bëhet, as nuk procedohet në Serbi ndaj Radoiçiqit. Përkundrazi, përcillet ose ruhet me përcjellje zyrtare nga policia e Serbisë në takimet publike dhe ende shihet publikisht si njeri i afërt i Vuçiqit, me afërsi edhe me djalin e tij”, ka thënë ai.
Sipas Çollakut, mungesa e masave ndëshkuese ndaj Serbisë dhe presionit të mjaftueshëm nga Bashkimi Evropian e dëshmon, sipas tij, pabarazinë në trajtimin e dy vendeve.
“Serbia nuk vuan për BE-në, sepse nuk ka sanksione ndaj saj dhe nuk ka trysni”, ka përfunduar Çollaku.
