Kryeministri i Kosovës, Albin Kurti ka pritur të premten në takim kryetarin e Bashkësisë Islame të Kosovës, Myftiun Naim Tërnava.
Sipas njoftimit, gjatë takimit është diskutuar për bashkëpunimin ndërmjet institucioneve dhe Bashkësisë Islame të Kosovës, ecurinë e projekteve të përbashkëta, si dhe rëndësinë e solidaritetit, humanizmit dhe vlerave shoqërore e kombëtare.
Në takim janë trajtuar edhe zhvillimet politike në Kosovë, rajon dhe më gjerë.
Me këtë rast, Myftiu Naim Tërnava e ka uruar Kurtin për zgjedhjen e presidentes së re të Kosovës, Justina Shiroka Pula. Sipas njoftimit, zgjedhja e saj ka shmangur mbajtjen e zgjedhjeve të katërta parlamentare brenda më pak se dy vjetësh dhe ka mundësuar kthimin e stabilitetit institucional.
Një tjetër temë e diskutimit ishte aktgjykimi i shkallës së parë nga Dhomat e Specializuara në Hagë ndaj ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi. Sipas njoftimit të Qeverisë, gjatë takimit u diskutua edhe për procesin e mëtejmë në apel, ndërsa aktgjykimi u cilësua si i padrejtë dhe i pasaktë.
Në fund të takimit, kryeministri Kurti shprehu mirënjohje për rolin dhe kontributin e Bashkësisë Islame të Kosovës për popullin e vendit./teve1.info/
