Deputeti i PDK-së, Arben Mustafa, ka folur për ofertën e kryeministrit Albin Kurti drejtuar PDK-së për zgjidhjen e ngërçit politik.
I ftuar në emisionin “Kënd i Debatit” në Tëvë1, Mustafa ka treguar arsyet pse, sipas tij, PDK-ja nuk po e pranon ofertën e Kurtit.
Ai ka thënë se Projektligji për Dhomat e Specializuara, i cili sipas tij synon të mbrojë luftën e UÇK-së, nuk mund të përdoret si instrument për pazare politike.
“Për një arsye shumë të thjeshtë. Projektligji për Dhomat e Specializuara, ligji që do ta mbrojë luftën e UÇK-së, nuk është për pazar politik. Ne nuk e shohim si instrument politik. Ata që e shohin si instrument politik, po shihet ku e kanë pru vendin sot.
E kanë pru në buzë të zgjedhjeve të reja, duke i braktisur çlirimtarët atje dhe duke e braktisur shtetin për së dyti, se dojnë të kenë gjithë pushtetin. Ku thonë: ose gjithë pushtet, ose në zgjedhje. Kjo është situata ku na ka sjellë Albin Kurti e VV-ja.
Është e turpshme dhe e ulët që të trajtohet Ligji për Dhomat e Specializuara si instrument për pazare politike. ‘Unë juve ligjin, ju mua presidentin’. Po i kujt është ky ligj? Kujt do t’i shërbejë ky ligj? I kujt është UÇK-ja? Për kë është bërë ajo luftë?
Nëse kryeministri i Kosovës mendon që vetëm një partie i takon që ta mbrojë luftën çlirimtare, ta mbrojë sakrificën tonë, shtrohet pyetja: zoti kryeministër, i kujt është? Kë po e përfaqëson ai në këto institucione? Edhe nëse nuk mendon që edhe atij i takon ta mbrojë UÇK-në, prandaj është e turpshme të thuhet ‘ju mua presidentin, unë juve ligjin’. Edhe është e turpshme”, ka thënë Mustafa.
Mustafa është pyetur edhe për kandidaturën e Feride Rushitit për presidente dhe arsyen pse PDK-ja nuk po e mbështet atë.
Ai ka thënë se ka respekt për Rushitin, por ka kritikuar mënyrën se si, sipas tij, është përdorur kandidatura e saj në këtë proces.
“Unë kam respekt për Feride Rushitën dhe më vjen keq në cilën situatë e kanë prurë. Herën e parë e propozuan dhe përmes saj deshtën ta rrënojnë rendin kushtetues në Kosovë. Herën e dytë e propozuan pasi treguan gjithë seriozitetin me Bekim Sejdiun, duke e propozuar një kandidat i cili është tërhequr, edhe pastaj iu kthyen zonjës Feride Rushiti”, ka thënë tutje Mustafa.
