Aktivistët e nismës “Jo në emrin tim” kanë zhvilluar një aksion simbolik.
Kështu këtë të shtunë para Kuvendit të Kosovës, kanë vendosur një baner të madh me emrat e të gjithë deputetëve.
Në këtë pankartë emrat e ligjvënësve janë ndarë.
Sipas organizatorëve, ndarja është bërë sipas qëndrimeve të pritshme lidhur me miratimin e Ligjit për mbrojtjen e vlerave të UÇK-së dhe ndryshimet në legjislacionin për Dhomat e Specializuara.
Detaje për këtë aksion ndau organizatori i protestës Çlirim Haziri.
“Sot kemi vendosur këtu një baner para Kuvendit të Republikës së Kosovës, ku i kemi paraqitur të gjithë deputetët e Kuvendit të Republikës së Kosovës. Këtu janë të ndarë deputetët të cilët presim ta votojnë ligjin për Ushtrinë Çlirimtare të Kosovës, janë pakicat të cilat edhe kanë votuar një deklaratë, gjithashtu edhe deputetët shqiptarë. Ndërsa në pjesën tjetër janë deputetët e pakicave serbe, nga të cilët nuk presim se do ta votojnë këtë ligj. Nuk presim që ata të kenë mëshirë apo një iniciativë për drejtësinë, për drejtësinë e cila e goditi shtetin e Kosovës, e cila realisht është një padrejtësi e thirrur në emër të drejtësisë”, tha Haziri.
Sipas Hazirit, deputetët e Kuvendit kanë vetëm edhe tri ditë mandat për të reflektuar përpara shpërbërjes së mundshme të legjislaturës.
“Sot çështjen e Ushtrisë Çlirimtare të Kosovës, të identitetit tonë kombëtar, e kemi në prag të këtij Kuvendi dhe presim që ligji të votohet. Ligji duhet të votohet sa më shpejt. Ne i dimë obligimet kushtetuese të këtij Parlamenti, e këta deputetë që janë këtu kanë mandat vetëm edhe tre ditë, nëse nuk rrezikohen e nuk shpërbëhet ky Kuvend nga disponimi i tyre politik, pra disponimi i politikanëve”, theksoi Haziri.
Andaj bënë thirrje edhe një herë që të thirret një seancë e të kalojë ligji.
“Shpresoj shumë që ligji të votohet, të thirret në seancë të jashtëzakonshme nëse do të jetë e nevojshme, edhe nga kryetarja e Parlamentit, por edhe nga partitë e tjera, t’i bëjnë nënshkrimet e ta thërrasin seancën, ta votojnë ligjin për UÇK-në”, potencoi ai.
Kujtojmë se protesta për të kundërshtuar vendimin e Gjykatës Speciale në Hagë vazhduan edhe sonte ne ditën e 18-të.
