Kryeministri i Republikës së Kosovës, Albin Kurti, ka pritur të premten në takim ambasadorin e Mbretërisë së Bashkuar në Kosovë, Jonathan Hargreaves.
Sipas Zyrës së Kryeministrit, ambasadori Hargreaves e ka uruar Kurtin për Qeverinë dhe mandatin e ri, ndërsa të dy kanë shprehur gatishmërinë për të vazhduar bashkëpunimin dhe për të thelluar më tej marrëdhëniet ndërmjet Kosovës dhe Mbretërisë së Bashkuar.
Gjatë takimit është diskutuar edhe për zhvillimet e fundit politike në Kosovë, me theks të veçantë te përmbyllja e procesit të formimit të institucioneve.
“Qeveria e Republikës së Kosovës mbetet e përkushtuar për forcimin e mëtejmë të marrëdhënieve me Mbretërinë e Bashkuar dhe do të punojë drejt zgjerimit dhe thellimit të partneritetit strategjik ndërmjet dy vendeve”, thuhet në njoftim.
Sipas Zyrës së Kryeministrit, synim është zgjerimi i bashkëpunimit në fushën e tregtisë, investimeve, teknologjisë dhe sportit, përfshirë edhe përgatitjet për Lojërat Mesdhetare 2030./teve1.info/
