Pas më shumë se tri javësh, Fatmir Sheholli është sjellë sërish para trupit gjykues.
Por, kësaj radhe për t’u dhënë fjalët hyrëse nga Prokuroria dhe mbrojtja.
Fatmir Sheholli akuzohet për spiunazh dhe shantazh. Megjithatë, ai u deklarua i pafajshëm.
Derisa kishe edhe disa pakënaqësi.
“Shumë fotografi nga galeria e telefonit tim, që nuk kanë qenë në Facebook, kanë dalë në media. Hetuesia e Policisë bëri keqpërdorim absolut”, u shpreh i akuzuari Sheolli.
Ndërkohë në fjalët hyrëse prokurori u shpreh se Sheholli me dashje ka ndihmuar shërbimin sekret të Serbisë- BIA’në.
“I pandehuri, sipas udhëzimeve të Bojan Dimiqit, fillimisht i ka dërguar të dhënat e automjetit të tij dhe më pas ka udhëtuar në Mitrovicë të Veriut, ku nga një person i panjohur sipas udhëzimeve të BIA-së, i ka pranuar disa material me përmbajtje audio dhe transkripte të bisedave për disa zyrtarë të Ministrisë për Kthim dhe Komunitete, me qëllim të komperitimit të tyre dhe se për kryerjen e këtij operacioni, në të njëjtin material janë dhënë edhe 5000 mijë euro si shpërblim nga ana e BIA-s për të pandehurin Sheholli”, tha prokurori special, Bekim Kodraliu.
Ndërsa lidhur me veprën e dytë, atë të shantazhit, prokuroria tha se do të paraqes prova personale dhe materiale.
“Pa mëdyshje do të vërtetohet se i njëjti, përmes kërcënimeve për publikimin e lajmeve apo të dhënave në lidhje me të dëmtuarit Arben Jetullahu, ka kërkuar mjete financiare në mënyra të ndryshme, në të kundërtën do të publikonte të dhëna në mediat publike”, u shpreh Kodraliu.
Por me fjalët hyrëse të prokurorit nuk u nda i kënaqur avokati i të pandehurit.
“Z. prokuror e din çka ka punuar z. Sheholli para luftës, gjatë dhe pas luftës, këtu është munduar që me këto prova materiale dhe historikun e Fatmir Shehollit të krijohet bindja edhe tek trupi gjykues, mirëpo edhe në pjesën tjetër që i njëjti çfarë do prove zotëri prokuror e ka, përmend, ta arsyetoj me faktin ja ku qenka Fatmir Sheholli”, tha Mentor Neziri –aovakt i Shehollit.
Seanca vazhdoi me rrëfimin e dëshmitarit i cili pohoi se nga Sheholli kishe pranuar kërcënime.
“Prej paraburgimit më ka çuar porosi që nëse nuk na ndihmon financiarisht, do t’i publikojmë disa video. Pas kësaj, unë i kam thënë: ‘Publiko çka të duash, se nuk të ndihmoj’. Herën e parë më kishte kërkuar një ndihmë për familjen e tij dhe ia kam dërguar 500 euro”, tha dëshmitari Arben Jetullahu.
Ndërkohë, seanca e radhës gjyqësore ndaj Fatmir Sheholli pritet të mbahet më 30 nëntor, 2 dhjetor dhe 10 dhjetor.
