Në një konferencë për media të mërkurën, Kurti ka thënë se palët s’janë shumë larg, por ka shtuar se Kosova është e kujdesshme duke treguar se dallimi është tek termi “të zhdukur me dhunë”.
“Do ta kisha theksuar një dallim kryesor që ekziston sa i përket emërtimit të persona me dhunë të zhdukur gjatë luftës. Beogradi insiston të quhen vetëm persona të pagjetur, ne kërkojmë që kjo të theksohet që është bërë me dhunë. Insistimi ynë është që të bëhet kjo. Natyrisht, se janë persona të pagjetur, por nuk mund të krahasohen me dikë që zhduket në mal gjatë hikingut. Këta persona mund të konsiderohen pjesë e gjenocidit serb në Kosovë. Ky është dallim konceptual të cilën do ta shohim a do arrijmë ta përmirësojmë”, ka thënë Kurti, të mërkurën në një konferencë për medie, shkruan teve1.info.
Në një intervistë për RTK-në, Lajçaku u shpreh se për marrëveshjen e të pagjeturve është dakorduar 99.5 për qind e tekstit, e se duhet vetëm vullneti politik.
“Më e dukshme dhe më logjike, do të thosha se një rezultat pozitiv i takimit do të ishte marrëveshja për personat e zhdukur sepse është çështje kaq e dhimbshme për familjet e personave të zhdukur… Po punojmë në veçanti për këtë. Jemi dy fjalë afër ose larg marrëveshjes”, ka thënë ai./teve1.info/
