Prokuroria Themelore në Prizren ka ngritur aktakuzë ndaj katër personave për vepra penale që lidhen me keqpërdorim të pozitës zyrtare, ndërtim pa leje dhe punime ndërtimore të kundërligjshme.
Sipas Prokurorisë, H.M. dhe A.D., në cilësinë e zyrtarëve në Komunën e Suharekës, dyshohen për keqpërdorim të pozitës apo autoritetit zyrtar, ndërsa N.B. dyshohet për ndërtim pa leje dhe A.H. për punime ndërtimore të kundërligjshme.
Rasti lidhet me parregullsi gjatë mbikëqyrjes dhe realizimit të punimeve ndërtimore në një objekt në Komunën e Suharekës.
Sipas aktakuzës, H.M., inspektor i ndërtimtarisë, dhe A.D., drejtor i Inspeksioneve në Komunën e Suharekës, nuk kanë ndërmarrë veprimet e nevojshme pasi ishin konstatuar parregullsi në objekt.
Prokuroria thotë se investitori ishte urdhëruar të ndërpriste punimet dhe të pajisej me leje ndërtimore, por kontrolli i mëtejshëm nuk ishte kryer brenda afatit. Po ashtu, gjatë një inspektimi të mëvonshëm, gjendja e objektit, sipas aktakuzës, nuk ishte pasqyruar në mënyrë reale dhe nuk ishin evidentuar të gjitha tejkalimet nga leja ndërtimore.
Ndërkohë, investitori N.B. dyshohet se e ka ndërtuar objektin në kundërshtim me kushtet e lejes. Leja parashihte etazhitetin B+P+2, ndërsa objekti, sipas aktakuzës, është realizuar me B+P+3. Po ashtu, janë tejkaluar vijat ndërtimore për rreth 730 metra katrorë.
Sipas Prokurorisë, këto tejkalime i kanë mundësuar investitorit përfitim prej rreth 716 mijë eurosh, ndërsa Komunës së Suharekës i është shkaktuar dëm financiar në vlerën e taksave të papaguara.
A.H., pronar i kompanisë ndërtimore “B.P.”, dyshohet se ka kryer punime ndërtimore në kundërshtim me kushtet e lejes së ndërtimit.
Prokurori i rastit i ka propozuar gjykatës që, pas shqyrtimit gjyqësor dhe vlerësimit të provave, të pandehurit të shpallen fajtorë dhe të dënohen sipas ligjit./teve1.info/
