Drejtori i Global Crisis Group, Ilir Kulla, ka komentuar vendimin ndaj katër ish-krerëve të Ushtrisë Çlirimtare të Kosovës, të cilët në total janë dënuar me 81 vjet burgim.
Kulla ka folur për këtë çështje në emisionin “Matrix” në Tëvë1, me moderator Mehmet Kalisi, ndërsa është pyetur edhe për qëndrimin e tij ndaj themelimit të Gjykatës Speciale.
Ai ka thënë se ka qenë kundër kësaj gjykate që në fillim, duke treguar se për këtë çështje kishte pasur edhe përplasje me ish-presidentin Hashim Thaçi.
“Kam qenë krejt në fillim fare kundër kësaj gjykate. Edhe me z. Hashim Thaçi jemi grindur për këtë gjykatë. Sot po e vuajnë ata dhe familja e tyre, sepse të kesh një njeri në burg, në ato kushte, e di familja se çfarë stresi është. Por kjo gjë tashmë ka ikur. Është se si do të vazhdohet, si do të vijohet në raport me padrejtësinë. Unë ta thashë se kjo ka filluar me padrejtësi dhe u mbyll me padrejtësi”, ka deklaruar Kulla.
Ai ka thënë se në biseda private kishte shprehur edhe më herët shqetësimin se ish-krerët e UÇK-së mund të dënoheshin.
“Edhe në biseda private unë ta kam thënë se do të dënohen dhe do të bëhen shembull, por unë shpresoj me zemër se kjo nuk do të bëhet”, është shprehur ai.
Kulla ka ngritur pikëpyetje edhe rreth disa prej pretendimeve të trajtuara gjatë procesit gjyqësor, duke iu referuar periudhës së luftës dhe zhvillimeve pas përfundimit të saj.
“Ka një element interesant, ku gjyqtarë, nga viti 1997 deri në qershor të vitit 1999, në mediat e Kosovës, në propagandë dhe në mediat sociale, i referohen edhe shumë ngjarjeve që kanë ndodhur vite pas datës 20 qershor. Por do t’i kthehem asaj në publik që ka thënë miku im, Kadri Veseli: UÇK-ja ka qenë deri më 12 qershor. Edhe demilitarizimi është bërë në shtator dhe pas kësaj nuk ka pasur UÇK”, ka thënë Kulla.
Ai ka theksuar se kushdo që ka kryer krime duhet të përballet me përgjegjësinë, por ka ngritur shqetësimin për mënyrën se si, sipas tij, është përdorur kjo çështje.
“Kush ka bërë krime, le të shkojë t’u përgjigjet. Pra, çështja është: përdorim politik për interesa politike, apo më keq, mafioze apo biznesi, të njërës palë apo të palës tjetër, po i jep faturë Kosovës sot. Edhe sot vazhdojnë e flasin, se as nuk i dinë gjërat, as nuk i kuptojnë gjërat”, ka deklaruar Kulla.
