Policia e Kosovës ka njoftuar se të dielën, më 20 shtator 2026, do të ketë kufizime dhe bllokime të qarkullimit në disa rrugë të Prishtinës dhe Fushë Kosovës, për shkak të zhvillimit të maratonës ndërkombëtare “Prishtina 2026”.
Sipas Policisë, masat e trafikut do të përfshijnë edhe një pjesë të autostradës, ndërsa bllokimet do të zbatohen nga ora 09:00 deri në përfundim të maratonës.
“Policia e Kosovës do të ndërpresë qarkullimin e automjeteve në rrugën Prishtinë – Fushë-Kosovë në drejtim të Pejës dhe anasjelltas, deri te nyja (kyçja në autostradën ‘Ibrahim Rugova’)”, thuhet në njoftimin e Policisë.
Policia ka bërë të ditur se janë ndërmarrë të gjitha masat e nevojshme për sigurinë e pjesëmarrësve dhe menaxhimin e trafikut gjatë aktivitetit.
Këto janë rrugët alternative
1. Pejë – Prishtinë:
Ngasësit që udhëtojnë nga Peja drejt Prishtinës rekomandohet të përdorin rrugën Sllatinë – Magurë – Lipjan, dhe më pas të lidhen me rrugën nacionale Ferizaj – Prishtinë.
2. Pejë/Fushë-Kosovë:
Për udhëtimin nga Peja dhe Fushë-Kosova, alternativa është rruga Sllatinë – Bardh i Vogël – Kuzmin – Fushë-Kosovë.
3. Prishtinë/Veternik – Pejë/Aeroport:
Ngasësit duhet të përdorin drejtimin Prishtinë – Lipjan – Rufc i Ri – Poturoc – Magurë – Aeroport.
4. Mitrovicë – Pejë/Aeroport:
Rekomandohet përdorimi i autostradës nga Mazgiti në drejtim të Shkupit, me dalje në Lipjan dhe vazhdim përmes Rufc i Ri – Poturoc – Magurë – Aeroport.
5. Mitrovicë – Ferizaj:
Qarkullimi do të jetë i lirë në rrugën nacionale dhe nuk parashikohen ndalesa për këtë drejtim.
6. Transporti publik:
Autobusët në relacionin Prishtinë – Fushë-Kosovë – Aeroport dhe në drejtim të Pejës nuk duhet të qarkullojnë në rrugën e bllokuar gjatë zhvillimit të garës, por duhet të përdorin rrugët alternative.
Policia e Kosovës u ka bërë thirrje të gjithë qytetarëve që të kenë mirëkuptim, të planifikojnë udhëtimet me kohë dhe t’i respektojnë udhëzimet e zyrtarëve policorë për të shmangur vështirësitë në trafik.
