Përvoja e fituar gjatë Lojërave Mesdhetare “Taranto 2026” pritet të jetë një nga elementet e rëndësishme në përgatitjet e Kosovës për organizimin e Lojërave Mesdhetare “Prishtina 2030”.
Përfaqësues të institucioneve dhe të Komitetit Olimpik të Kosovës, të cilët ishin pjesë e delegacionit të Kosovës në Taranto, e kanë vlerësuar pjesëmarrjen në këto Lojëra si një mundësi të rëndësishme për të parë nga afër mënyrën se si funksionon një organizim i madh ndërkombëtar, nga aspekti sportiv, organizativ dhe logjistik.
Fidani Shatri nga Ministria e Sportit thekson për KosovaPress se për Kosovën është e rëndësishme që çdo organizim paraprak të shërbejë si përvojë për vitin 2030, sidomos duke pasur parasysh se vendi për herë të parë do të jetë nikoqir i një ngjarjeje multifunksionale të përmasave të tilla.
“Çdo organizim paraprak me i parapri organizimit të cilin e kemi në vitin 2030, normal që është përvojë e mirë që të shohim nga afër organizimin e funksionimit të rrjetit organizativ të eventit, në këtë rast të Lojërave Mesdhetare. Normal që përvoja të tilla janë më se të mirëseardhura pasi që përtej organizimit që kemi pasur viteve të fundit në sporte të ndryshme, organizim të ngjarjeve multifunksionale nuk është që kemi pasur kohët e fundit ose ndonjëherë, dhe normal që hera e parë në vitin 2030, dhe çdo përvojë nga afër është më se e mirëseardhur që ta sjellim në vendin tonë dhe të na hyjë ajo përvojë në punë për Prishtina 2030”, deklaroi Shatri.
Në të njëjtën linjë është edhe zëdhënësi i KOK-ut, Kushtrim Krasniqi, i cili thotë se pjesëmarrja e një delegacioni të madh të Kosovës në Taranto kishte edhe qëllimin e qartë të marrjes së përvojës organizative, përveç asaj sportive.
“Vetë fakti pse kemi marrë pjesë me një delegacion kaq të madh, prej 163 sportistësh, dhjetëra zyrtarë, trajnerë dhe staf tjetër, ka qenë arsyeja që organizatori i ardhshëm është Prishtina 2030, jemi ne si Kosovë. Dhe synimi ynë ishte që të marrim përvojën e duhur edhe në aspektin sportiv, por edhe organizativ… Sa i përket anës organizative, natyrisht që edhe ne si staf i KOK-ut, shumica kemi qenë në Taranto për të marrë përvojën e duhur, por jo vetëm ne, por ka pasur edhe zyrtarë të federatave, sepse dihet mirë që secila federatë do të jetë organizatore e ngjarjes ndërkombëtare siç janë Lojërat Mesdhetare, pra në sportin e tyre”, u shpreh Krasniqi.
Një prej sfidave kryesore për organizimin e “Prishtina 2030” pritet të jetë edhe sigurimi dhe trajnimi i një numri të madh të vullnetarëve. Përvojat e marra nga Taranto, sipas Krasniqit, mund të ndihmojnë edhe në krijimin e një sistemi të tillë në Kosovë.
“Natyrisht që do të jetë sfidë e madhe për ne, sepse dihet mirë që vullnetarizmi është një gjë shumë kruciale për organizimin e ngjarjeve, sidomos atyre ndërkombëtare, dhe natyrisht që edhe ne duhet të organizohemi sa më mirë në mënyrë që t’i kemi më shumë se 2,000 vullnetarë. Natyrisht që nuk do të jenë vetëm nga Kosova, por duhet t’i trajnojmë edhe ata që janë, t’i angazhojmë në për ngjarje të ndryshme të federatave në mënyrë që të trajnohen për një ngjarje të tillë siç janë Lojërat Mesdhetare. Sigurisht që do të kemi edhe vullnetarë me përvojë siç ishin në Taranto apo edhe në ngjarje të tjera që kanë marrë pjesë më herët, por shumica e tyre do të jenë nga Kosova”, theksoi Krasniqi.
Lojërat Mesdhetare “Prishtina 2030” do të jenë ngjarja më e madhe multisportive e organizuar ndonjëherë në Kosovë. Prishtina do të jetë nikoqire e edicionit të 21-të të Lojërave Mesdhetare, të cilat do të zhvillohen nga 24 korriku deri më 4 gusht 2030, me gara të planifikuara edhe në lokacione të tjera, përfshirë Durrësin për sportin e lundrimit.
Kosova fitoi të drejtën për organizimin e këtyre Lojërave më 8 shtator 2023 në Heraklion të Greqisë, në votimin e Komitetit Ndërkombëtar të Lojërave Mesdhetare. Edicioni i Prishtinës pritet të mbledhë rreth 3,500 sportistë nga 26 shtete dhe të përfshijë 33 sporte.
Përvoja e marrë në Taranto 2026, nga funksionimi i strukturave organizative, angazhimi i vullnetarëve, puna e federatave, akomodimi, transporti dhe menaxhimi i garave, shihet si një mundësi konkrete për të identifikuar paraprakisht sfidat me të cilat mund të përballet Kosova në vitin 2030.
