Kryetari i Lidhjes Demokratike të Kosovës, Lumir Abdixhiku, së bashku me Presidenten e VI-të të Kosovës, deputeten Vjosa Osmani, dhe deputetë të tjerë të LDK-së, kanë bërë homazhe në nderim të jetës dhe veprës së Dr. Flora Brovinës.
Në një njoftim të LDK-së thuhet se Brovina ishte një nga figurat e shquara të historisë së Kosovës, e njohur si mjeke, humaniste, poete dhe veprimtare për lirinë, dinjitetin njerëzor dhe të drejtat e grave e fëmijëve.
“Jeta dhe veprimtaria e saj janë dëshmi e një përkushtimi të madh ndaj Kosovës, veçanërisht në vitet më të vështira të represionit dhe luftës”, thuhet në njoftim.
Sipas LDK-së, Brovina, pavarësisht burgosjes dhe dhunës, nuk u përkul dhe vazhdoi edhe pas luftës kontributin e saj në jetën publike dhe në ndërtimin e shtetit të Kosovës.
LDK-ja ka shprehur respekt dhe mirënjohje për jetën, sakrificën dhe kontributin e saj, duke theksuar se kujtimi për Dr. Flora Brovinën do të mbetet pjesë e historisë së Kosovës dhe e brezave të ardhshëm.
“I lehtë i qoftë dheu i Kosovës!”, thuhet në përfundim të njoftimit.
