Sulmuesi Lufti Dalipi ka preferuar Zvicrën U21 përpara Kosovës dhe Shqipërisë, të cilat i kanë bërë ftesë por që i ka refuzuar.
Ylli i skuadrës së Vaduzit do të luajë me Zvicrën U21, vendim që për momentin ka shkaktuar reagime të shumta.
Krahas Kosovës, Shqipërisë e Zvicrës, Dalipi kishte mundësinë për ta zgjedhur edhe Portugalinë për shkak të nënës së tij.
Në një intervistë për mediumet zvicerane, Dalipi ka konfirmuar kontaktet me Kosovën e Shqipërinë, si dhe shpjegoi arsyen pse vendosi për U21 të Zvicrës.
“Shqipëria dhe Kosova më kanë kontaktuar, por objektivi im aktual është të luaj për U21 të Zvicrës dhe pastaj do të shohim. Dua të kem paraqitje të mira me Zvicrën U21 pasi jam ende i ri”, ka thënë Dalipi.
Dalipi 20-vjeçar ka shpërthyer këtë sezon në Superligën e Zvicrës, ku në 8 paraqitje me fanellën e Vaduzit, ai ka shënuar 3 gola dhe ka bërë 7 asistime.
