Prokuroria Themelore në Pejë, Departamenti për Krime të Rënda, ka ngritur aktakuzë ndaj të pandehurit R.K. dhe një personi juridik, nën dyshimin për kryerjen e veprave penale “Keqpërdorimi dhe mashtrimi në prokurim publik” dhe “Falsifikimi i dokumentit”.
Sipas aktakuzës, R.K., në cilësinë e pronarit dhe përfaqësuesit të autorizuar të një operatori ekonomik, dyshohet se gjatë pjesëmarrjes në një procedurë të prokurimit publik të zhvilluar nga Spitali i Përgjithshëm në Pejë për furnizim me libra të protokollit, ka paraqitur dhe përdorur dokumentacion të rremë dhe të paautorizuar.
Prokuroria pretendon se në dokumentacionin e dorëzuar janë përfshirë CV-ja, kontrata e punës dhe certifikata universitare në emër të një personi tjetër, pa lejen dhe dijeninë e tij.
Sipas aktakuzës, këto dokumente dyshohet se janë përdorur me qëllim të ndikimit në vendimmarrjen e autoritetit kontraktues dhe përfitimit të kontratës.
Po ashtu, R.K. dyshohet se ka përpiluar një kontratë pune të falsifikuar, me qëllim që ajo të përdorej si dokument origjinal në kuadër të procedurës së prokurimit publik.
Në anën tjetër, personi juridik akuzohet se ka paraqitur dhe përdorur dokumentacion të rremë dhe të paautorizuar gjatë procedurës së prokurimit, me qëllim të ndikimit në vendimin e autoritetit kontraktues dhe përfitimit të kontratës.
Sipas Prokurorisë, me këto veprime ekziston dyshimi i bazuar mirë se R.K. ka kryer veprat penale “Keqpërdorimi dhe mashtrimi në prokurim publik” dhe “Falsifikimi i dokumentit”, ndërsa personi juridik dyshohet për veprën penale “Keqpërdorimi dhe mashtrimi në prokurim publik”.
Prokurorja e çështjes i ka propozuar gjykatës që të pandehurit të shpallen fajtorë dhe të dënohen sipas ligjit për veprat penale për të cilat akuzohen.
Të pandehurit konsiderohen të pafajshëm derisa fajësia e tyre të vërtetohet me një vendim gjyqësor të formës së prerë./teve1.info/
