Deputeti i Lidhjes Demokratike të Kosovës, Avdullah Hoti ka kritikuar mënyrën se si po zhvillohet procesi i konstituimit të Kuvendit të Kosovës, duke e cilësuar atë si jashtë çdo sjelljeje politike.
Hoti ka bërë të ditur se LDK-ja do të marrë pjesë në seancën e Kuvendit në rast se ajo thirret, ndërsa ka thënë se për hapat e mëtejmë do të vendosin pasi të përfundojë procesi i konstituimit.
“Nuk e di a do të thërrasin ose jo, këto lojëra, kjo është jashtë çdo sjellje politike. Se a do të ftohet seanca, ne do të marrim pjesë, po ta kemi qartë. Jemi jashtë, jo në kundërshtim me Kushtetutën, po jemi komplet jashtë spektrit kushtetues, çdo sjellje që bëhet”, tha ai.
Sa i përket mundësisë që LDK-ja ta dërgojë çështjen në Gjykatën Kushtetuese, Hoti tha se kjo është diskutuar brenda partisë, por se ende nuk është marrë një vendim përfundimtar.
“Do ta diskutojmë. E kemi diskutuar, po nuk kemi marrë ndonjë qëndrim, sapo të konstituohet Kuvendi, duhet të vendosim se si do të bëjë”, tha ai.
Hoti ka folur edhe për të drejtën e LDK-së për të propozuar përfaqësuesin e saj në Kryesinë e Kuvendit.
“Kryetari i Kuvendit përfaqëson Kuvendin e Kosovës, nënkryetari i Kuvendit përfaqëson grupin parlamentar. Pra është diskrecion i plotë i joni që të propozojmë personin që na përfaqëson neve në kryesinë e Kuvendit”, tha ai.
