Nënkryetari i Organizatës së Veteranëve të Luftës së Ushtrisë Çlirimtare të Kosovës Gazmend Syla, ka deklaruar sot në emisionin “Ditari” në Tëvë 1, se ata si organizatë janë të gatshëm edhe për marshin e 12 shtatorit, i cili do të mbahet në Prishtinë, por edhe për datën 16 shtator, kur pritet shpallja e aktgjykimit në rastin ndaj Hashim Thaçit, Kadri Veselit, Rexhep Selimit dhe Jakup Krasniqit.
“Jemi të gatshëm për datën 12, sikurse jemi të gatshëm edhe për datën 16. Prandaj, po shihet një mobilizim. Kemi shumë bashkëluftëtarë që janë të gatshëm edhe të marrin pjesë atje, po edhe të kontribuojnë në forma të ndryshme, me marrë edhe njerëz të tjerë”, deklaroi Syla.
Ai tha se është i bindur se secili veteran, më 16 shtator, do të jetë nëpër sheshe nga qendra të ndryshme ku janë vendosur ekrane për të ndjekur shpalljen e aktgjykimit.
“Pra, jemi të bindur se secili veteran i UÇK-së, atë ditë do të jetë në protestë, në marshin më 12, por sigurisht edhe më datën 16 do të jenë nëpër sheshe, duke përcjellë nga vendi i ngjarjes, ku janë ofruar edhe disa ekrane televizive në çdo qendër të vendit tonë, për të parë se çfarë do të ndodhë në gjykim atje”, tha tutje Syla.
