Deputetja nga radhët e Lidhjes Demokratike të Kosovës, Jehona Lushaku-Sadriu, është deklaruar për media në hollin e Kuvendit, ku ka folur për propozimin e tyre për nënkryetar.
Ajo ka deklaruar se besojnë se Kujtim Shala, për shkak të përgatitjes së tij profesionale dhe akademike, do t’i bënte nder Kuvendit nëse do të ishte nënkryetar.
“Ne e kemi propozuar zotin Kujtim Shala, sepse besojmë se përgatitja e tij profesionale dhe akademike i bën nder Kuvendit të Republikës së Kosovës. Andaj, kemi qëndruar prapa propozimit tonë”, u deklarua ajo.
Tutje, ajo tha se është LVV-ja ajo që po bllokon konstituimin e Kuvendit.
“Vërtet, është praktikë e paprecedentë. Grupi më i madh parlamentar po harron që jemi veç jashtë afateve kushtetuese dhe, në përpjekje të mirë, po ia japim mundësinë Kosovës që të konsolidohet Kuvendi. Kjo nuk po bëhet për fajin e Vetëvendosjes”, u deklarua më tej ajo.
