Ambasada e Republikës së Kosovës në Tajlandë ka njoftuar se nga 15 shtatori 2026 do të hyjnë në fuqi rregulla të reja për shtetasit e Kosovës që udhëtojnë drejt Mbretërisë së Tajlandës.
Sipas njoftimit të Ambasadës, qytetarët e Kosovës që posedojnë pasaportë të zakonshme do të duhet të aplikojnë për vizë elektronike (e-Visa) para udhëtimit në Tajlandë.
Aplikimi për vizë duhet të bëhet përmes portalit zyrtar të vizave elektronike të Tajlandës.
“Duke filluar nga 15 shtatori 2026, shtetasit e Republikës së Kosovës që mbajnë pasaportë të zakonshme duhet të aplikojnë për vizë elektronike para udhëtimit në Mbretërinë e Tajlandës”, thuhet në njoftimin e Ambasadës.
Përveç vizës elektronike, të gjithë udhëtarët që hyjnë në Tajlandë duhet të plotësojnë online Kartelën e Arritjes Dixhitale të Tajlandës (TDAC) para mbërritjes në vend.
