Kryetari i Lidhjes Demokratike të Kosovës, Lumir Abdixhiku është deklaruar sërish për zhvillimet e fundit brenda kësaj partie.
Me një status në Facebook ai ka thënë se beteja e disa eksponentëve në LDK nuk lidhet me parimet apo interesin e Kosovës. Sipas tij, përplasja po zhvillohet për drejtimin e Lidhjes Demokratike.
“S’rrotullohet shteti për një ambicie. Mendoja se e kanë për parime e për Kosovë; por beteja qenka për kryetar të LDK-së për njëri-tjetrin. Për keqardhje!”, ka shkruar Abdixhiku.
Ai ka theksuar se LDK-ja njihet për një traditë tjetër politike.
“LDK njihet ndryshe. Me klasë politike që dikur jepte gjithçka për shtetin, jo me të atillë që do ta japë shtetin për vete”, ka shtuar kreu i saj.
Abdixhiku e ka përfunduar reagimin me kritika të ashpra ndaj kundërshtarëve të tij brenda partisë.
“Zot, fali, kaq dinë; se populli s’ka për t’i falur!”, ka shkruar ai.
Të paktën 6 deputetë të LDK-së kanë dalë kundër propozimit që Bekim Sejdiu të zgjedhjet president shteti. Ky i fundit është mbështetur nga Abdixhiku.
