Zëvendësministri i Punëve të Brendshme i Maqedonisë së Veriut, Astrit Iseni, po qëndron për një vizitë zyrtare në Kosovë, ku është pritur nga ministri i Punëve të Brendshme, Xhelal Sveçla, dhe zëvendësministri Enver Dugolli.
Gjatë takimit është vlerësuar bashkëpunimi ndërmjet dy vendeve, veçanërisht bashkëpunimi ndërmjet ministrive të punëve të brendshme.
Palët kanë diskutuar për nevojën e adresimit të sfidave të përbashkëta, me fokus të veçantë në siguri dhe zbatimin e ligjit.
Dugolli ka prezantuar prioritetet e Ministrisë së Punëve të Brendshme, duke theksuar angazhimin për krijimin e një klime më të sigurt dhe ruajtjen e Kosovës ndër vendet më të sigurta në Evropë dhe në botë.
Në takim është diskutuar edhe për marrëveshjet që lidhen me kalimet kufitare ndërmjet dy vendeve dhe lehtësirat për qytetarët, veçanërisht për banorët që jetojnë në zonat përgjatë kufirit.
Gjatë vizitës, Dugolli dhe Iseni kanë vizituar Qendrën Kombëtare të Menaxhimit të Kufirit, ku janë informuar nga afër për procedurat e menaxhimit të kufijve të Kosovës, me theks të veçantë në pikat kufitare me Maqedoninë e Veriut.
Ata kanë vizituar edhe Akademinë e Kosovës për Siguri Publike, ku janë njohur me programet e trajnimit për zyrtarët policorë, zyrtarët korrektues, doganierët dhe zjarrfikësit.
Në Akademi, dy zëvendësministrat kanë takuar edhe kadetët Jetlum Bunjaku dhe Sokol Zymberi, djemtë e heronjve të Policisë së Kosovës, Afrim Bunjaku dhe Enver Zymberi.
Sipas njoftimit, ata pas përfundimit të akademisë do të vazhdojnë rrugën e prindërve të tyre në shërbim të sigurisë dhe qytetarëve të Kosovës.
Në kuadër të vizitës është vizituar edhe Agjencia për Regjistrimin Civil, ku delegacionet janë njoftuar për shërbimet që ofrohen për qytetarët, përpjekjet për përmirësimin e cilësisë dhe shpejtësisë së shërbimeve, si dhe procesin e digjitalizimit.
Në përfundim të vizitës, Astrit Iseni ka falënderuar për mikpritjen dhe ka theksuar përkushtimin e Maqedonisë së Veriut dhe Ministrisë së Punëve të Brendshme për avancimin e agjendave të përbashkëta në funksion të stabilitetit dhe sigurisë.
Iseni ka vënë theksin edhe te bashkëpunimi në luftën kundër grupeve kriminale që veprojnë në të dyja vendet, duke theksuar nevojën për vazhdimin e bashkëpunimit institucional dhe luftën e pakompromis ndaj krimit të organizuar./teve1.info/
