Inspektorati Policor i Kosovës (IPK) ka nisur hetimet lidhur me një incident të raportuar në parkingun e një qendre tregtare, ku janë përfshirë një zyrtar policor jashtë detyrës zyrtare dhe dy qytetarë, njëri prej tyre i mitur.
Sipas njoftimit të IPK-së, incidenti ka ndodhur gjatë pasdites së ditës së djeshme dhe dyshohet se ka nisur pas një mosmarrëveshjeje lidhur me parkingun.
Pas marrjes së informacionit për rastin, hetuesit e IPK-së kanë dalë në vendin e ngjarjes për të verifikuar rrethanat dhe për të mbledhur informacionet fillestare.
Personat e përfshirë më pas janë shoqëruar në objektin policor për trajtimin e rastit.
Gjatë procedurave të mëtejshme, në IPK janë paraqitur pretendime për tejkalim të autorizimeve policore nga një zyrtar tjetër.
Njëri prej personave të përfshirë ka pretenduar se, pas shoqërimit në polici, ndaj tij është përdorur forcë nga një zyrtar policor në Stacionin Policor në Graçanicë.
Lidhur me këto pretendime, hetuesit e IPK-së kanë qenë në kontakt me prokurorin kompetent dhe, nën drejtimin e tij, kanë ndërmarrë veprime hetimore për të sqaruar të gjitha rrethanat e rastit.
“Lidhur me këto pretendime, hetuesit e IPK-së kanë qenë në kontakt të vazhdueshëm me prokurorin kompetent dhe, nën drejtimin e tij, kanë ndërmarrë dhe janë duke ndërmarrë veprime hetimore për ndriçimin e plotë të të gjitha rrethanave të rastit. Në kuadër të hetimit, zyrtari policor i dyshuar për keqtrajtim është suspenduar me rekomandim të IPK-së ndërsa hetimet janë duke u zhvilluar në drejtim të veprës penale “Keqtrajtimi gjatë ushtrimit të detyrës zyrtare ose autorizimeve publike”, thuhet në njoftim.
Ndërkohë, hetimet ndaj qytetarëve të përfshirë do të vazhdojnë të zhvillohen nga Policia e Kosovës, në konsultim me prokurorin kompetent, nën dyshimin për veprën penale të sulmit.
Sa i përket zyrtarit policor me gradën e kapitenit, veprimet hetimore do të ndërmerren nga hetuesit e IPK-së, nën dyshimin për veprën penale të kanosjes.
“IPK thekson se hetimi është në fazën fillestare dhe se të gjitha veprimet hetimore po zhvillohen në koordinim me prokurorin kompetent, duke respektuar procedurat ligjore, të drejtat e të gjitha palëve të përfshira dhe parimin e prezumimit të pafajësisë. Inspektorati Policor i Kosovës mbetet i përkushtuar që çdo pretendim për keqpërdorim të autorizimeve policore apo shkelje të të drejtave të qytetarëve të trajtohet me profesionalizëm, paanshmëri dhe në përputhje të plotë me ligjin”, theksohet në fund të njoftimit./teve1.info/
