Vërshimet e janarit e dëmtuan rëndë urën në Smallushë të Lipjanit.
Madje për ditë të tëra ajo mbeti e pakalueshme.
Disa ditë pas vërshimeve u bë një intervenim, duke bërë një zgjidhje të përkohshme për urën.
Tetë muaj pas, gjendja e urës mbetet shqetësuese.
Banorët kanë frikë se ndokush edhe mund ta pësoj nga këto dëmtime të urës.
“Prej vërshimeve është kështu, por këta e kanë ndreq veç përkohësisht. U kane edhe kryetari e ka kqyr tha duhet me u rregullua, por kjo ka mbet kështu kjo. Veç deri të bien dikush se nuk vjen më askush me kqyr, e kur bien e tëra pastaj vrapojnë krejt. Kjo duhet me u rregullua para se me ra dikush e me u lëndua se kjo krejt lëvizë”, deklaroi banori Bislim Krasniqi.
E banori tjetër, Salih Sopa, tregon se shumë fëmijë kalojnë çdo ditë nëpër këtë rrugë.
“Ura është prej kohës së vërshimeve prej fillimit të vitit, fillim të viti janë ardh e kanë bërë një improvizim këtu mbas katër pesë ditë edhe më nuk kanë qenë këtu. Kjo urë ka filluar të dëmtohet prapë besoj që brenda javës kjo është e pakalueshme, tash që ka filluar mësimi fëmijët duhet të kalojnë këndej”, tha Sopa.
Televizioni ka kontaktuar gjatë ditës edhe me komunën e Lipjanit, të cilët në një përgjigje me shkrim kanë treguar se tashmë janë ndarë mjetetet për ndërtimin e urës së re në fshatin Smallushë.
“Lënda aktualisht është në procedurë të prokurimit publik. Operatorët Ekonomikë të interesuar do të kenë mundësinë të ofertojnë në kuadër të procedurës së tenderimit. Bazuar në dinamikën e procedurave, presim që brenda këtij muaji të përfundojë procesi dhe të lidhet kontrata për realizimin e projektit”, shkruhet në njoftim.
Sipas komunës, përveç urës në fshatin Smallushë, do të ndërtohet një urë e re edhe në fshatin Gadime.
Për gjashtë deputetët që dolën kundër vendimit të Kryesisë së LDK-së, për emrin e presidentit konsensual, njohësit e politikës fajin po e vënë tek kreu i partisë. Për këtë thonë se një vendim i këtij të fundit për largim nga lista, mund të jetë fatal për LDK-në.
