Gjykata Themelore në Prishtinë ka shpallur aktgjykim dënues ndaj Sh.B., i akuzuar për veprat penale “Falsifikimi i dokumenteve” dhe “Mashtrimi”.
I akuzuari është shpallur fajtor dhe është dënuar me dënim unik prej 6 vitesh burgim, si dhe me 2 mijë euro gjobë.
Sipas aktgjykimit, Sh.B. dyshohet se me dashje dhe me qëllim të përfitimit të kundërligjshëm të dobisë pasurore, përmes paraqitjes së rreme të fakteve, ka tentuar ta vërë në lajthim të dëmtuarin A.H., duke i ofruar për shitje një pronë në Prishtinë në vlerë prej 800 mijë eurosh.
Sipas gjykatës, bëhet fjalë për një pronë që ishte nën menaxhimin e Agjencisë Kosovare të Privatizimit.
Për këtë pronë, i akuzuari fillimisht kishte arritur të falsifikonte dokumentet përmes akteve noteriale.
Megjithatë, pas verifikimit të dokumenteve nga noterja dhe dëshmitarja V.A., ishte konstatuar se autorizimi në emër të Sh.B. ishte i falsifikuar.
Për këtë arsye, veprimet e të akuzuarit kishin mbetur në tentativë.
Përveç dënimit me burgim dhe gjobës, Sh.B. është obliguar të paguajë edhe 200 euro në emër të paushallit gjyqësor dhe 20 euro në emër të Programit për Kompensimin e Viktimave të Krimit.
Këto pagesa duhet të bëhen brenda 15 ditësh nga plotfuqishmëria e aktgjykimit.
Gjykata ka urdhëruar gjithashtu konfiskimin e përhershëm të dokumentit të falsifikuar.
Deri në plotfuqishmërinë e aktgjykimit, i akuzuari do të mbrohet në liri.
Ndërkaq, i dëmtuari A.H., për realizimin e kërkesës pasurore-juridike, është udhëzuar në kontest të rregullt juridiko-civil.
Kundër këtij aktgjykimi, palët kanë të drejtë ankese në Gjykatën e Apelit të Kosovës brenda afatit prej 30 ditësh nga dita e pranimit të aktgjykimit./teve1.info/
