Policia e Kosovës ka shqiptuar një gjobë prej 300 eurosh ndaj një kompanie pronare të një kamioni, pasi automjeti po transportonte blloqe ndërtimi me ngarkesë të pasiguruar.
Rasti është evidentuar më 3 shtator gjatë një patrullimi të rregullt nga zyrtarët e Stacionit Policor Prizren-Veri, në kuadër të Drejtorisë Rajonale të Policisë në Prizren.
Sipas Policisë, kamioni është ndaluar për kontroll në magjistralen Prizren-Gjakovë, në zonën e Landovicës. Gjatë kontrollit është konstatuar se ngarkesa e kamionit nuk ishte siguruar siç duhet, duke paraqitur rrezik për sigurinë në komunikacion.
Për këtë shkelje, ndaj personit juridik, përkatësisht kompanisë pronare të kamionit, është shqiptuar gjobë në vlerë prej 300 eurosh.
Policia e Kosovës ka bërë të ditur se mbetet e përkushtuar në zbatimin e ligjit dhe garantimin e sigurisë publike, duke ndërmarrë vazhdimisht masa për parandalimin dhe ndalimin e veprimeve që mund të rrezikojnë jetën dhe sigurinë e qytetarëve./teve1.info/
