Ushtruesja e detyrës së Presidentes së Kosovës, Albulena Haxhiu, ka liruar nga detyra 18 gjyqtarët serbë, të cilët kishin dhënë dorëheqje në vitin 2022.
Sipas njoftimit të Haxhiut në rrjetin social Facebook, lirimi nga detyra është bërë pas propozimit të Këshillit Gjyqësor të Kosovës (KGJK).
“Pas propozimit të Këshillit Gjyqësor të Kosovës, në përputhje me përgjegjësitë kushtetuese dhe ligjore, sot kam liruar nga detyra 18 gjyqtarë serbë, të cilët kishin dhënë dorëheqje në vitin 2022”, ka deklaruar Haxhiu.
Më 27 gusht 2026, KGJK vendosi të mos i pranonte kërkesat për tërheqjen e dorëheqjeve. Vendimi u mor me 9 vota për, një kundër dhe një abstenim. Kryesuesi i KGJK-së, Rrustem Thaqi, abstenoi, ndërsa anëtarja Ivana Milenkoviq votoi kundër. Pas kësaj, emrat e gjyqtarëve iu dërguan Haxhiut për procedurën e lirimit nga detyra.
