Prokuroria Themelore në Mitrovicë ka ngritur aktakuzë ndaj një personi me inicialet V.M., i cili dyshohet për veprat penale “Vrasje e rëndë në tentativë” dhe “Mbajtja në pronësi, kontroll ose posedim i paautorizuar i armëve”.
Në aktakuzë thuhet se i pandehuri, nga një datë e pacaktuar deri më 1 nëntor 2025, me dashje ka ndihmuar persona të tjerë, duke fotografuar gjatë paraditen e 1 nëntorit 2025 automjetin e të dëmtuarit dhe duke ia dërguar fotografitë personit me inicialet A.F.
“Sipas aktakuzës, i pandehuri V.M., nga një datë e pacaktuar deri më 1 nëntor 2025, me dashje ka ndihmuar persona të tjerë në kryerjen e veprës penale, në atë mënyrë që, gjatë paradites së 1 nëntorit 2025, ka fotografuar automjetin e të dëmtuarit M.V., pranë shtëpisë së tij, dhe fotografitë ia ka përcjellë A.F.”, thuhet në aktakuzë.
Më pas, në aktakuzë bëhet e ditur se i dëmtuari M.V. ishte kontaktuar dhe ishte dakorduar që të shkonte në fshatin Kapuricë, në Komunën e Leposaviqit, ndërsa për vendndodhjen e tij ishte njoftuar A.F.
“Më pas, i dëmtuari M.V. është kontaktuar dhe është dakorduar që të shkonte në një lokacion të caktuar në fshatin Kapuricë, Komuna e Leposaviqit, për të blerë mjaltë. Pasi ishte nisur me automjetin e tij të tipit “Niva”, i pandehuri, përmes telefonit, e ka njoftuar A.F.-në se i dëmtuari ishte nisur në drejtim të kufirit”, thuhet në njoftimin e prokurorisë.
Tutje në aktakuzë bëhet e ditur se persona të panjohur kanë plagosur dhe rrëmbyer të dëmtuarin.
“Sipas aktakuzës, në momentin kur i dëmtuari ka arritur në lokacionin e caktuar, persona të panjohur e kanë plagosur dhe rrëmbyer atë, duke e dërguar më pas në territorin e Serbisë”, thuhet në aktakuzë.
Tutje, bëhet e ditur se i pandehuri, në shtëpinë e tij në fshatin Leshak të Leposaviqit, në kundërshtim me ligjin e zbatueshëm mbi armët, pa autorizim dhe leje përkatëse, ka mbajtur në posedim një armë gjuetie dytytëshe, një tytë të armës së gjatë, një jelek gjuetie me 28 fishekë të armës së gjatë, si dhe 11 fishekë të tjerë të armës së gjatë.
Në vendin e ngjarjes, sipas njoftimit, i janë sekuestruar armët dhe fishekët.
