Fillimisht pritën në radhë për t’u regjistruar.
E më pas u ulën në sallë, bashkë me fëmijët e tyre.
Ndërkaq çantat e përgatitura me mjete shkollore ishin lënë gati për t’iu dorëzuar familjeve përfituese.
Kështu organizata Islamic Relief Kosova së bashku me donatorët e saj, në Prishtinë dhuruan këto mjete për fëmijët jetimë.
Për disa nga prindërit, kjo është hera e tretë që përfitojnë nga kjo ndihmë.
“Është ndihmesë shumë e madhe, jam nanë me 3 fëmijë jetimë, është hera e tretë që marr, është ndihmesë se na pajisemi me mjete të shkollës”, u shpreh një prind.
Mirënjohje shprehu edhe një nënë tjetër, e cila kujdeset për gjashtë fëmijët e saj jetim.
“Jam nënë e 6 jetimëve, desha ta bëj një falënderim për këtë organizatë dhe donatorëve, që neve na mundësojnë të rrisim fëmijët sa më lehtë”, tha Zyla Terakaj- prind.
Nga “Islamic Relief Kosova” thonë se kjo nismë është menduar për t’ua lehtësuar familjeve fillimin e vitit shkollor.
“Fillimi i vitit shkollor është gjithmonë një moment i veçantë, për fëmijët sjell emocion, ndërsa për nënat angazhime e normalisht edhe shpenzime, prandaj ‘Islamic Relief Kosova’ me ndihmën e donatorëve, përmes këtij projekti kemi dashur të jemi pranë jush që t’ju ndihmojmë sado pak në fillimin e vitit të ri shkollor”, tha Albulena Gashi-Hajrullahu – zëvendësdrejtoreshë në “Islamic Relief Kosova”
E për fëmijët, organizatorët kanë edhe një porosi.
“Në emër të kujdesit ndaj fëmijëve ju inkurajoj të mësoni shumë, t’i ndiqni ëndrrat e juaja dhe pavarësisht vështirësive të mos dorëzoheni asnjëherë, ne do të bëjmë çmos t’ju mbështesim me aq sa kemi mundësi, në përkrahjen e shkollimit tuaj dhe atë që mund të keni rrugës”, tha Luljeta Gashi menaxhere në departamentin e organizatës.
Sipas organizatës, numri i synuar i çantave nuk është plotësuar ende.
“Aktualisht janë 1200 familje për të cilat kujdesemi, në numër të jetimëve janë afër 2000 jetimë që kujdesemi për ta, kjo shpërndarje është një prej projekteve që e bëjmë çdo vit. Projekti jonë nuk ka mbaru ende, kampanja jonë që njerëzit me dhuru për çanta për fëmijët jetim nuk ka mbaru se ende nuk është plotësu numri”, u shpreh Lavdim Gashi- menaxher i departamentit për ngritjen e fondeve
E në fund pas fjalimeve, u bë edhe shpërndarja e çantave.
