Në Ditën Ndërkombëtare për Përkujtimin e Viktimave të Zhdukur me Dhunë, ish-presidentja e Kosovës, Vjosa Osmani, ka kritikuar Serbinë për mungesën e informacionit për personat e zhdukur gjatë luftës së fundit në Kosovë.
Përmes një postimi në Facebook, Osmani ka deklaruar se Serbia, duke mbajtur të mbyllura arkivat dhe informacionin për personat e zhdukur, është duke shkelur zotimet e dhëna në Bruksel dhe marrëveshjet e pranuara.
Ajo ka thënë se propaganda nuk mund ta fshehë të vërtetën, duke theksuar se ende nuk dihet fati i mbi 1,500 personave të zhdukur me dhunë gjatë luftës në Kosovë.
“Mbi 1500 persona të zhdukur me dhunë gjatë luftës së fundit në Kosovë, shumë prej tyre fëmijë, ende mbesin pa varr, pa drejtësi dhe pa përgjigje. Ata janë plaga më e thellë e Kosovës dhe dëshmia më e dhimbshme e krimeve të kryera ndaj popullit tonë nga ana e Serbisë. Synimi i regjimit gjenocidal të Serbisë ishte shfarosja, dëbimi dhe shkatërrimi i identitetit tonë kombëtar, i familjeve tona dhe i së ardhmes së Kosovës. Duke mbajtur të mbyllura arkivat dhe informacionin për personat e zhdukur, në kundërshtim me zotimet e dhëna në Bruksel, Serbia jo vetëm që po e mohon të kaluarën, por po shkel edhe marrëveshjet që ka pranuar.Propaganda nuk mund ta fshijë të vërtetën sepse Serbia ende fle mbi varrezat masive të civilëve të pafajshëm dhe vazhdon ta përsërisë krimin”, ka shkruar ajo në Facebook.
Osmani ka theksuar se përgjegjësia dhe kërkimi i së vërtetës nuk përfundojnë me përfundimin e luftës, duke kërkuar që familjeve t’u jepet e drejta për të mësuar fatin e të afërmve të tyre.
“Por krimi nuk përfundon me heshtjen e armëve. Ai vazhdon edhe sot kur mohohet e vërteta, kur fshihen gjurmët dhe kur familjeve u mohohet e drejta elementare për të ditur fatin e më të dashurve të tyre.Për mijëra familje në Kosovë, drejtësia nuk është histori. Është dhimbje. Është ankth. Është pritje”, ka përfunduar Osmani./teve1.info/
