Inspektorati Qendror i Mbikëqyrjes së Tregut (IQMT), në kuadër të Ministrisë së Industrisë, Ndërmarrësisë, Tregtisë dhe Inovacionit, ka njoftuar se marketet po respektojnë udhëzimet për ndalimin e shitjes së produkteve të identifikuara si të papërshtatshme për konsum.
Sipas IQMT-së, ky vlerësim vjen pas vazhdimit të kontrolleve në markete, lidhur me produktet e qumështit të identifikuara si të mospërputhshme në raportet e Agjencisë së Ushqimit dhe Veterinarisë (AUV).
Inspektimet janë zhvilluar në Prishtinë, Pejë, Gjilan, Mitrovicë, Gjakovë dhe Fushë Kosovë, me fokus në verifikimin e respektimit të udhëzimeve për mosshitjen e produkteve të dyshimta apo të papërshtatshme për konsum.
IQMT ka bërë të ditur se rezultatet e kontrolleve tregojnë se operatorët ekonomikë po i zbatojnë udhëzimet e inspektoratit dhe po ndalojnë nga shitja produktet e identifikuara si të papërshtatshme për konsum, në përputhje me raportet e AUV-it.
Inspektorati ka theksuar gjithashtu rëndësinë e rolit të konsumatorëve në identifikimin dhe raportimin e parregullsive në treg.
“Konsumatorët mbesin pjesë e rëndësishme e këtij procesi, duke raportuar çdo parregullsi apo dyshim lidhur me produktet në treg përmes platformës Viber, në numrin e dedikuar për ankesa: +383 (0) 46 311-000”, thuhet në njoftim./teve1.info/
