Ministria e Industrisë, Ndërmarrësisë, Tregtisë dhe Inovacionit ka publikuar çmimet e derivateve të naftës për ditën e sotme.
Sipas njoftimit të ministrisë, çmimi maksimal i naftës është caktuar 1.74 euro për litër, që është 2 centë më i ulët krahasuar me ditën e djeshme, kur shitej me 1.76 euro për litër.
Ndërkaq, çmimi i benzinës mbetet 1.53 euro për litër, ndërsa gazi vazhdon të tregtohet me 0.63 euro për litër, pa ndryshime nga dita e djeshme.
Ndryshe, çmimin më të lartë që nga nisja e luftës në Lindjen e Mesme nafta e arriti në Kosovë më 9 prill, kur një litër shitej për 1.91 euro.
Prej arritjes së armëpushimit mes Shteteve të Bashkuara të Amerikës dhe Iranit, çmimi i naftës në tregjet ndërkombëtare kishte shënuar rënie.
Megjithatë, situata ndryshoi sërish pas rikthimit të sulmeve dhe mbylljes së serishme të Ngushticës së Hormuzit, një nga korridoret më të rëndësishme për transportin e naftës në botë./teve1.info/
