Kryeministri në detyrë i Kosovës, Albin Kurti, së bashku me zëvendëskryeministren dhe ministren e Drejtësisë, Donika Gërvalla-Schwarz, ka vizituar Institutin për Mjekësi Ligjore (IML), ku janë bartur mbetjet mortore që dyshohet se u përkasin të paktën 23 personave të zhdukur me dhunë gjatë luftës së fundit në Kosovë.
Sipas Kurtit, mbetjet mortore janë gjetur në tri lokacione në fshatrat Kalludër dhe Jabukë, në komunën e Zubin Potokut. Një muaj pas fillimit të gërmimeve, procesi ka kaluar në fazën e ekzaminimeve dhe procedurave profesionale për identifikimin dhe dokumentimin e tyre.
Kurti ka bërë të ditur se deri më tani katër mostra të ADN-së, që u përkasin mbetjeve mortore të gjetura në Jabukë, janë dërguar për analizë në Hagë.
“Zbardhja e fatit të të zhdukurve me dhunë, përveçse i jep fund pritjes së familjeve, me ankth e vuajtje, i hap rrugë kërkimit të drejtësisë”, ka theksuar Kurti.
Ai ka bërë të ditur se që nga përfundimi i luftës janë kryer rreth 2,700 gërmime, ndërsa vetëm gjatë këtij viti, në 17 lokacione, janë gjetur gjithsej 30 mbetje mortore.
Gjatë vizitës, Kurti ka folur edhe për investimet në modernizimin e Institutit për Mjekësi Ligjore. Sipas tij, mbi 814 mijë euro janë investuar në infrastrukturën e institutit, duke rritur sigurinë dhe funksionalitetin e objektit dhe duke krijuar kushte më të mira për ofrimin e shërbimeve mjeko-ligjore.
Në kuadër të këtyre investimeve janë rehabilituar dhe modernizuar salla e autopsisë, laboratorët e toksikologjisë, histopatologjisë dhe antropologjisë, si dhe është krijuar një arkiv
