Partia Demokratike e Kosovës (PDK) do të depozitojë sot kallëzim penal në Prokurorinë Speciale ndaj deputetit të Lëvizjes Vetëvendosje, Avni Dehari për “Shpërdorim të detyrës zyrtare”.
Këtë e ka bërë të ditur deputeti i PDK-së, Përparim Gruda, në një konferencë për media.
Sipas Grudës, kallëzimi penal lidhet me mënyrën e ushtrimit të detyrës së Deharit si kryesues i seancës konstituive të Kuvendit të Kosovës.
Ai ka pretenduar se Dehari nuk po e ushtron këtë detyrë në përputhje me Rregulloren e Punës së Kuvendit dhe Kushtetutën e Kosovës.
“PDK do të depozitojë kallëzim penal në Prokurorinë Speciale ndaj deputetit Avni Dehari, i cili, siç e dini, për shkak të moshës është drejtues i seancës konstituive. Detyrë të cilën ai nuk po e ushtron në përputhje me Rregulloren e Punës së Kuvendit dhe Kushtetutën e Kosovës”, ka deklaruar Gruda.
Ai ka thënë se, sipas Rregullores së Kuvendit, seanca duhet të thirret çdo 48 orë dhe se Dehari, në cilësinë e kryesuesit, do të duhej ta vazhdonte seancën konstituive.
Gruda ka deklaruar se, pavarësisht letrave të dërguara nga PDK-ja, Dehari nuk ka reflektuar dhe nuk e ka thirrur seancën.
“Siç e dini, Rregullorja e Kuvendit kërkon që të mblidhemi çdo 48 orë. Avni Dehari, si kryesues, do të duhej ta mblidhte Kuvendin çdo 48 orë dhe ta vazhdonte seancën konstituive. Përkundër që ne i kemi dërguar disa letra, ai nuk ka reflektuar dhe nuk e ka thirrur seancën dhe prandaj ne do të paraqesim kallëzim penal për shpërdorim të detyrës zyrtare”, ka thënë Gruda./teve1.info/
