Policia e Kosovës ka ndërhyrë në dy raste të ndara në qytetin e Gjakovës për të parandaluar zhvillimin e garave të shpejtësisë, të cilat rrezikonin drejtpërdrejt sigurinë e pjesëmarrësve në komunikacion dhe qytetarëve.
Sipas njoftimit të Drejtorisë Rajonale të Policisë në Gjakovë, zyrtarët policorë të patrullave dhe Njësisë Rajonale të Trafikut Rrugor kanë identifikuar dy motoçikleta duke zhvilluar gara shpejtësie në rrugën “Martirët Qerkezi”.
Në një rast tjetër, në rrugën “Gaspër Karaqi”, policia ka hasur dy automjete të përfshira në gara të ngjashme.
Falë reagimit të menjëhershëm të zyrtarëve policorë, të dyja rastet janë ndaluar, ndërsa personave të përfshirë u janë shqiptuar gjoba në përputhje me legjislacionin në fuqi.
Policia e Kosovës ka rikujtuar se garat e shpejtësisë dhe sjelljet e papërgjegjshme në trafik përbëjnë rrezik serioz për jetën e njerëzve dhe janë ndër faktorët që mund të çojnë në aksidente me pasoja fatale.
“Vetëm gjatë këtij viti, si pasojë e aksidenteve të trafikut, kemi regjistruar një numër të lartë viktimash, çka e bën edhe më urgjente nevojën për respektimin e rregullave të trafikut rrugor”, theksohet në njoftim.
Në këtë kuadër, Drejtoria Rajonale e Policisë në Gjakovë u ka bërë thirrje të gjithë pjesëmarrësve në komunikacion që të respektojnë rregullat e trafikut, të shmangin veprimet e rrezikshme dhe të tregojnë përgjegjësi në rrugë./teve1.info/
