Agjencia e Metrologjisë së Kosovës (AMK), në bashkëpunim me Inspektoratin Qendror të Mbikëqyrjes së Tregut (IQMT), kanë nisur aksionin për mbikëqyrjen e peshës së bukës dhe verifikimin e peshoreve në furrat e Kosovës.
Inspektimet kanë nisur në rajonin e Prishtinës, ndërsa gjatë ditëve në vijim do të shtrihen edhe në komunat e tjera të vendit.
Aksioni është ndërmarrë pas ankesave të vazhdueshme të konsumatorëve për mospërputhje mes peshës së deklaruar të bukës dhe peshës reale të produktit.
Gjatë kontrolleve, zyrtarët e AMK-së po verifikojnë rregullsinë dhe afatin e vlefshmërisë së peshoreve që përdoren nga furrtarët. Po ashtu, inspektorët po kontrollojnë nëse operatorët ekonomikë posedojnë pëlqimin për kushtet minimale teknike.
Sipas Ligjit për Mbrojtjen e Konsumatorit, mospërputhja ndërmjet masës së deklaruar dhe asaj reale të produktit konsiderohet mashtrim ndaj konsumatorit dhe mund të ndëshkohet me gjobë prej 1,000 deri në 10,000 euro.
Ndërkaq, përdorimi i peshoreve ose mjeteve të tjera matëse të parregullta mund të ndëshkohet me gjobë prej 500 deri në 1,500 euro për subjektet juridike.
AMK dhe IQMT u kanë bërë thirrje furrtarëve që të verifikojnë me kohë peshoret, të sigurojnë matje të sakta dhe të respektojnë kërkesat ligjore për mbrojtjen e konsumatorëve.
Aksioni do të vazhdojë në të gjithë territorin e Kosovës, me synim garantimin e saktësisë së matjeve dhe mbrojtjen e të drejtave të konsumatorëve.
