Qeveritë e disa vendeve evropiane kanë këshilluar qytetarët e tyre që udhëtojnë ose ndodhen në Francë të shmangin protestat dhe turmat e mëdha, pas përshkallëzimit të trazirave gjatë fundjavës, ku pati arrestime, plaçkitje dhe përleshje me policinë.
Italia u ka kërkuar qytetarëve të regjistrojnë praninë e tyre në Francë dhe të tregojnë kujdes të shtuar.
Gjermania ka paralajmëruar se trazirat mund të vazhdojnë, duke u bërë thirrje shtetasve të saj të ndjekin udhëzimet e policisë lokale, shkruan Reuters.
Edhe Çekia dhe Polonia kanë këshilluar shmangien e demonstratave dhe zonave ku zhvillohen tubime, ndërsa Holanda, Danimarka, Suedia, Finlanda dhe Norvegjia u kanë bërë thirrje qytetarëve të tyre të qëndrojnë larg protestave dhe të respektojnë udhëzimet e autoriteteve lokale.
