Apple pritet të përballet me një rritje të çmimeve të serisë iPhone 18, pasi kostot e çipave të memories RAM dhe NAND janë rritur ndjeshëm.
Sipas raportimeve të fundit, Apple fillimisht është përpjekur ta përballojë vetë rritjen e kostove, por presioni mbi marzhet e fitimit është bërë gjithnjë e më i madh. Për këtë arsye, kompania mund t’ua kalojë një pjesë të kostos konsumatorëve.
Raportimet flasin për një rritje prej rreth 100 dollarësh për të gjitha modelet e iPhone 18, krahasuar me paraardhësit e tyre, transmeton Telegrafi.
Nëse këto parashikime rezultojnë të sakta, iPhone 18 Pro mund të nisë nga rreth 1,199 dollarë, ndërsa modelet e tjera do të kenë gjithashtu çmime më të larta.
Rritja e kostove të memories nuk po prek vetëm Apple. Edhe prodhues të tjerë të mëdhenj, përfshirë Samsung dhe Google, kanë përballuar presione të ngjashme dhe kanë rritur çmimet e disa pajisjeve.
Apple, sipas burimeve të cituara, ka dashur fillimisht të shmangë një rritje të drejtpërdrejtë të çmimeve, por ruajtja e marzheve të fitimit është bërë më e vështirë.
Në këtë situatë, një rritje prej 100 dollarësh konsiderohet si një kompromis relativisht i moderuar për kompaninë, duke pasur parasysh kostot në rritje të komponentëve dhe çmimet e konkurrencës.
Nëse konfirmohet zyrtarisht, iPhone 18 mund të bëhet një nga gjeneratat më të shtrenjta të iPhone-ve, edhe pse Apple pritet të përpiqet ta mbajë çmimin brenda nivelit të konkurrentëve kryesorë./telegrafi
