Janë drejtuar drejt fshatit Kollë të Vushtrrisë.
Kjo pasi është raportuar për një vatër zjarri aktive në këtë zonë.
Por, gjatë tentimit për ta ndalur zjarrin, zjarrfikësit u përballën me një problem, burimi kryesor i punës, uji, iu mungonte.
Andaj, u detyruan të kthehen në bazë për ta ndërruar automjetin.
Mirëpo, sipas banorëve ky problem në fshatin e tyre ka nisur para katër ditësh.
“Që katër ditë me zjarr jemi. Është tu u dhez zjarrmi non stop që katër ditë. Zjarrfikësit po vin, po herë po vin të përgatit, herë pa përgatit. Ju e pat edhe vetë që erdh pa ujë edhe u kthy. Do të thotë vjen e kthehet, zjarrmi nuk ndalet. Të rrezikum ndihem, po çka me bo tash”, thotë Muhamet Haziri-qytetar.
Meqë zjarri ka nisur të përhapet edhe pranë shtëpive, banorët thonë se ndihen të rrezikuar.
“Nuk e di çka me të thënë për ta, se ky është ardh prej Shalsit, i ka dy kilometra, është hy në këto mallet tona edhe është lëshu teposhtë… Dikun 3 hektarë mal tonin dhe të kojshive dhe kushërinjve, nuk po di sa ju ka djeg”, shprehet ai.
Në lidhje me problemet gjatë intervenimit, nga Zjarrfikësit e Vushtrrisë thonë se defektet janë të zakonshme, por problemi në këtë rast tashmë është rregulluar.
“Ndodhen këtu janë shumë normale që ndodhen defektet, po ai defekt veç është sanuar, domethënë aktualisht zjarrfikësit janë prapë në të njëjtën vatër zjarrit. Sigurisht që kemi probleme, kemi probleme normal, po më së shumti problemi më i madh që është puna, fuqia, punëtori, domethënë njerëz duhet me pasur shumë më shumë për këso lloj intervenimesh”, thuhet nga zjarrëfikësit në Vushtrri.
Vetëm këtë të diel, zjarrfikësit thonë se kanë intervenuar në shtatë lokacione.
“Përndryshe sot kemi pasur në shtatë lokacione intervenime, në fshatin Grac, në fshatin Tallaboc, në fshatin Broznik, Kollë, nga Novolani, kështu me radhë. Domethënë krejt kryesisht janë zjarret sot që janë ndezur”, thuhet tutje.
Aktualisht, zjarre aktive në Komunën e Vushtrrisë mbesin në fshatrat Kollë dhe Skoçan.
