Deputetja e Partisë Demokratike të Kosovës (PDK), Ariana Musliu-Shoshi, ka deklaruar se Kosova po përballet me një rrezik serioz për rendin kushtetues, duke kritikuar deputetin e Lëvizjes Vetëvendosje, Albin Kurti.
Në konferencë për media, Musliu-Shoshi ka thënë se sakrifica për Kosovën nuk ka përfunduar, duke e ndërlidhur të kaluarën e luftës me situatën aktuale politike dhe proceset gjyqësore në Hagë.
“E di që ka popuj që e fitojnë lirinë me një sakrificë. Mirëpo, Kosova vazhdon ta paguajë çmimin e saj edhe sot. Dje ishim në fushën e betejës, e sot në sallat e Gjykatës së Hagës. Dhe sakrifica për këtë shtet nuk ka përfunduar. Dhe pikërisht për këtë kemi detyrimin që Kosovën, Kushtetutën e demokracinë ta mbrojmë me çdo mjet demokratik. Dhe kjo nuk është një çështje nëse je me apo kundër Albin Kurtit. Nuk është as për klasën në mes të pozitës dhe të opozitës”, është shprehur Musliu-Shoshi.
Ajo ka bërë thirrje për mbrojtjen e rendit kushtetues dhe demokracisë, duke iu drejtuar drejtpërdrejt Kurtit me fjalën “reflekto”.
“Albin Kurtit i thuhet reflekto. Reflekto sepse nuk do të lejojmë kurrë që ta vendosësh veten mbi Kushtetutën. Sepse Kosova është më e madhe se çdo individ e Kushtetuta është më e fortë se çdo pushtet”, ka përfunduar Musliu-Shoshi.
Musliu-Shoshi ka kritikuar Kurtin edhe për, siç ka thënë ajo, përqendrimin te pushteti, në kohën kur qytetarët përballen me vështirësi ekonomike dhe pasiguri.
“Gjykata Kushtetuese ka folur, Kushtetuta ka folur, por deputeti Albin Kurti ka zgjedhur të mos i dëgjojë asnjërën. Dhe kur dikush vendos veten mbi Kushtetutën, ai më nuk po e mbron shtetin, por po e rrënon atë. Përderisa qytetarët tanë sot po përballen me cmime të larta, me largim të të rinjve dhe me pasiguri për të ardhmen, deputeti Albin Kurti merret vetëm me një gjë: se si ta mbajë pushtetin dhe se si t’i mbajë privilegjet që pushteti i jep atij”, ka thënë ajo.
Në fund, deputetja e PDK-së ka theksuar se pushtetet janë të përkohshme, ndërsa Republika dhe Kushtetuta janë të përhershme.
