Zyrtarët policorë të Njësisë së Komunikacionit Rrugor në Ferizaj kanë ndaluar dhe ndëshkuar një 19-vjeçar për tejkalim të shpejtësisë.
Rasti ka ndodhur në fshatin Lloshkobare të Ferizajt, gjatë kontrolleve të shtuara në trafik.
Sipas policisë, shoferi me inicialet A.B., i cili drejtonte një automjet VW Golf, me ngjyrë të zezë dhe targa vendore, është kapur duke lëvizur me 138 km/h, në një zonë ku shpejtësia e lejuar ishte 50 km/h.
“Shpejtësia është matur përmes radarit të veturës së policisë”, thuhet në njoftim.
Për këtë shkelje, ndaj shoferit janë shqiptuar masat përkatëse, përfshirë gjobë prej 300 eurosh, 3 pikë negative, si dhe masën mbrojtëse të ndalimit të drejtimit të automjetit për tre muaj.
Policia Rajonale e Ferizajt ka bërë të ditur se do të vazhdojë me kontrollet e rregullta dhe aktivitetet e intensifikuara në trafik, me qëllim rritjen e sigurisë rrugore dhe zbatimin e dispozitave ligjore.
“Policia fton qytetarët të bashkëpunojnë dhe të raportojnë çdo shkelje apo rrezik në trafikun rrugor përmes numrave 192, 0290/326-250, 0290/322-406, si dhe aplikacionit ‘Lajmëro Policinë’. Të gjitha informacionet e pranuara trajtohen me konfidencialitet të plotë”, theksohet në njoftim./teve1.info/
