Në sallën e Kuvendit u panë që në orën 11:00.
Me të hyrë brenda, deputetë të Partisë Demokratike filluan të ulen në vendet e tyre.
E bashkë me ta, të pranishëm u panë edhe deputetë të Aleancës.
Por këtë herë nuk erdhën duar bosh.
Në vendet e zbrazëta të ndara për partinë që fitoi përqindjen më të madhe të votave, u vendosën disa zarfe.
Përmes tyre, Vetëvendosjes po i bëhej thirrje ta konstituojë Kuvendin.
Thirrje me zë për formimin e institucioneve, nga foltorja iu bëri edhe deputeti Jakup Nura.
“Partia fituese nuk ka të drejtë me mbajtë peng shtetin. 48 orë nuk janë javë, nuk janë muaj, nuk janë pafundësi. Kryesuesi i përkohshëm nuk është kryetar i Kuvendit, ai është aty për të udhëhequr procedurën, andaj një funksion teknik nuk mund të shndërrohet në armë politike”, u shpreh Nura.
Përveç Nurës, fjalën e mori edhe deputetja Albana Bytyqi.
“Nuk mund të qëndrojmë të heshtur kur Kosova ka probleme e sfida që kërkojnë zgjidhje. Të gjithë e dinë që Kuvendi e institucionet duhet të formohen për shkak se nafta është 1.78, Kuvendi dhe institucionet duhet të formohen për shkak se duhet të zhbëhet Ligji për Shtetësinë, Kuvendi dhe institucionet duhet të formohen për shkak se Prishtina dhe shumë qytete e fshatra në Kosovë nuk kanë rrymë”, deklaroi Bytyqi.
Me të përfunduar, të dy partitë dolën në holl.
Në një konferencë për media, nga PDK edhe njëherë ritheksuan se nuk do të takohen me kryeministrin në detyrë, Albin Kurti.
“Ne nuk do të takohemi me Albin Kurti pasi është parë se këto takime i shërbejnë vetëm zvarritjes së procedurave për ta çuar vendin drejt zgjedhjeve të reja. Këto takime nuk kanë prodhuar asgjë dhe ne jemi të qartë se nuk do të takohemi. Ftesa jonë është të kthehemi te konstituimi dhe të jemi në shërbim të qytetarëve të Kosovës”, u shpreh deputetja e PDK-së, Blerta Deliu-Kodra.
Kurse deputeti i Aleancës, Burim Ramadani, tha se deputetët e Lëvizjes Vetëvendosje nuk po e përmbushin përgjegjësinë për të cilën kanë dhënë betimin.
Zgjedhjet e jashtëzakonshme janë mbajtur më 7 qershor, dhe që nga atëherë nuk është konstituuar Kuvendi, e as nuk është formuar Qeveria.
