Punëtorët u bënë gati për nisjen e punimeve.
Me kapele e veshje pune, ata qëndruan në lokacionin ku do të ndërtohet Parku Industrial në Livadicë të Podujevës.
Të pranishëm janë edhe ministrja në detyrë e Industrisë, Mimoza Kusari-Lila, dhe kryetari i Podujevës, Shpejtim Bulliqi.
Të gjithë bashkë pritën kryeministrin në detyrë Albin Kurti, i cili erdhi në Livadicë për të vënë gurthemelin.
Kurti tha se ky projekt synon të forcojë prodhimin vendor dhe të rrisë numrin e produkteve “Made in Kosova”.
“Synimi ynë si qeveri është të transformojmë ekonominë e Kosovës, të forcojmë prodhimin vendor dhe të krijojmë sa më shumë produkte në lloje dhe në numër, Made in Kosova, ashtu që jo vetëm të zëvendësojmë, por edhe të rrisim eksportet në tregjet evropiane dhe ndërkombëtare. Parqet industriale janë të menduara për bizneset vendore të cilat duan të zgjerohen dhe të rrisin kapacitetet e tyre”, u shpreh Kurti.
E për zhvillimin e zonave industriale foli edhe ministrja në detyrë, Mimoza Kusari-Lila.
“Aktualisht Ministria që drejtoj është duke u angazhuar në aktivizimin e 16-të zonave industriale. Synojmë që shumë shpejtë të ulim deficitin tregtar, të bëjmë zëvendësimin e produkteve të importuara, por edhe të rritet cilësia e eksporteve nga Republika e Kosovës”, u shpreh ajo.
Ndërkaq, kryetari i Podujevës, Shpejtim Bulliqi, e konsideroi projektin si një prej investimeve më të rëndësishme ekonomike për komunën.
“Një prej projekteve ekonomike më të rëndësishme për komunën tonë dhe shumë e mirëpritur nga bizneset tona. Podujevës i ka munguar një projekt i tillë”, tha ai.
E para se të vihej gurthemeli, afati i përfundimit të punimeve u bë pjesë e bisedës mes Kurtit, Kusari-Lilës dhe punëkryersit.
Kurti: Për sa kryhet kjo?
Kusari-Lila: Afati është deri në 2028
Punëkryersi: Afati është 350 ditë pune, por aty e kemi bo një kontratë
Kusari-Lila: Është një teren shumë i lehtë për me punu edhe në fund të vitit tjetër besoj kryhet…
Krejt në fund, krerët qeveritarë vunë gurthemelin e Parkut Industrial në Livadicë, duke shënuar kështu nisjen e punimeve.
