Është kjo lista që u publikua ditë më parë.
Kësaj përmbledhje po i prin Shqipëria, e cila është renditur e para në botë për siguri kibernetike.
Në raportin e National Cyber Security Index, shteti shqiptar ka gjithsej 98.33 pikë.
Indeksi vlerëson kapacitetet e shteteve për parandalimin e kërcënimeve kibernetike dhe reagimin ndaj incidenteve.
Pjesë e kësaj liste është edhe Kosova.
Megjithatë vendi ka marrë 50 pikë, kësisoj duke u pozicionuar në vendin e 89-të.
Por çfarë do të thotë kjo për Kosovën?
“Kosova ende nuk është pjesë e shumë indekseve të ranglistave kredibile, për sigurinë kibernetike mirëpo nëse e shohim në aspektin teknik, operacional dhe në aspektin e politikave kibernetike, mund të themi që Kosova është në një gjendje të mirë në aspektin e mbrojtjes së sulmeve kibernetike, nuk është shumë e ekspozuar”, thotë eksperti i kibernetikës, Driart Elshani.
Sipas Elshanit, pozita e 88-të, nuk paraqet të gjithë gjendjen e sigurisë kibernetike në vend.
“Ky indeks mat vetëm kuadrin institucional, ligjor dhe aspektin strategjik dmth ky indeks shiqon a ka një shtet strategji për sigurinë kibernetike, a ka institucione të dedikuara dhe dmth nuk e mat aspektin operacional, nuk e mat gjendjen reale në teren, nuk e mat kriterin e teknologjisë sa i përket sigurisë kibernetike. Rrjedhimisht indeksi e ka një emër të tillë mirëpo nuk e paraqet një fotografi gjithëpërfshirëse të gjendjës së sigurisë kibernetike në një shtet përveq kuadrit të politikave kibernetike”, u shpreh ai.
Megjithatë, Elshani thotë se Kosova duhet të investojë më shumë në kapacitetet për reagim ndaj incidenteve kibernetike.
