Kryeministri në detyrë i Kosovës dhe kryetari i Lëvizjes Vetëvendosje, Albin Kurti, nuk ka konfirmuar nëse sonte do të mbahet vazhdimi i seancës konstituive të Kuvendit, e cila u ndërpre një ditë më parë nga kryesuesi i seancës, Avni Dehari.
Ndërprerja erdhi pasi Kurti kërkoi kohë shtesë për zhvillimin e bisedimeve me qëllim arritjen e një marrëveshjeje për krijimin e institucioneve, me theks të veçantë te zgjedhja e presidentit.
Pas takimit me kryetarin e LDK-së, Lumir Abdixhiku, Kurti u ka thënë gazetarëve se vendimi për vazhdimin e seancës i takon ekskluzivisht kryesuesit të saj, Avni Deharit, duke shtuar se nuk ka pasur asnjë komunikim me të.
“Unë jam vetëm kryeministër në detyrë, nuk jam kryesues i seancës konstituive. Seanca konstituive e Kuvendit ka nisur dje dhe kur vazhdon e vendos kryesuesi i seancës. Unë nuk jam takuar sot me të dhe as nuk e kam ndërmend të takohem, sepse kam shumë punë si kryeministër në detyrë. Ju e dini, përveç që duhet të vij në bisedime me kryetarin e LDK-së, Lumir Abdixhikun, e duhet të shkruaj letra me kryetarin e PDK-së, Bedri Hamzën, sepse ai refuzon të takohet me mua, kam shumë punë me të gjithë ministrat dhe me projektet që vazhdojnë. Sepse shteti dhe qeveria nuk do t’ia dijë që ti ke takime e letra zyrtare me krerët e opozitës, e aq më pak mund të merrem me çështje juridike, procedurale që i përkasin kryesuesit të seancës”, ka deklaruar Kurti.
Ai ka shtuar se vendimi për vazhdimin e seancës do të bëhet i ditur nga kryesuesi i saj gjatë orëve të pasdites.
“Pra, pa dyshim që në këto orë të pasdites do ta kuptoni a do të thirret vazhdimi i seancës dhe kur”, ka përfunduar Kurti.
Ndryshe, sipas një aktgjykimit të Gjykatës Kushtetuese, deputetët kanë afat deri sonte në mesnatë të përmbyllin procesin e themelimit të Kuvendit, që do t’i hapte rrugë formimit të Qeverisë dhe zgjedhjes së presidentit./teve1.info/
