Analisti politik, Fitim Gashi ka komentuar deklaratat e deputeteve të Lidhjes Demokratike të Kosovës, Hykmete Bajrami dhe Jehona Lushaku-Sadriu, të cilat kanë theksuar se një nga kërkesat e LDK-së në negociatat për krijimin e institucioneve të reja është posti i presidentit.
Në emisionin “Këndi i Debatit” në Tëvë1, Gashi ka thënë se në LDK ka zëra që disa grupe të brendshme mund të kenë interes që kryetari i partisë, Lumir Abdixhiku, të zgjidhet president, duke liruar kështu postin e kryetarit të partisë.
Sipas tij, kjo mund të jetë një nga arsyet pse brenda LDK-së është artikuluar kërkesa për postin e presidentit, pasi një skenar i tillë do të mund të sillte zhvillime të reja brenda partisë.
“Ka pasur deklarata nga deputetët që e përmendën çështjen e presidentit. Pastaj ishte argumenti se këto grupe brenda LDK-së ndoshta kanë edhe interes që Abdixhiku të nominohet dhe të bëhet president, në mënyrë që ta lirojë postin e kryetarit të partisë, pasi u pa që në dy kuvendet nuk arritën ta shkarkojnë, edhe pse ai ofroi dorëheqjen. Pra, është edhe kjo një mundësi që, nëse ai shkon në postin e presidentit, atëherë mund të ketë zhvillime të tjera që ky grup i të pakënaqurve i dëshiron”, ka deklaruar Gashi.
Ndryshe, deputetet e zgjedhura të Lidhjes Demokratike të Kosovës, Hykmete Bajrami dhe Jehona Lushaku-Sadriu, kanë bërë të ditur se një nga kërkesat e LDK-së në kuadër të bisedimeve për krijimin e institucioneve të reja është që posti i presidentit t’i takojë kësaj partie.
Deklaratat e tyre vijnë një ditë pasi takimi ndërmjet kryetarit të LDK-së, Lumir Abdixhiku, dhe kryetarit të Lëvizjes Vetëvendosje, Albin Kurti, përfundoi pa arritjen e një marrëveshjeje për formimin e institucioneve.
Para mbledhjes së Grupit Parlamentar të LDK-së, Jehona Lushaku-Sadriu tha se kërkesa për postin e presidentit lidhet me nevojën për të siguruar një balancë të pushteteve në vend.
“Pra edhe në këtë kuptim, domethënë kërkesa jonë është që presidenti t’i takojë LDK-së, në kuptimin që të diskutojmë së bashku për gjithë pushtetin edhe pastaj të bëhet ndarja në mënyrë proporcionale. Ky ka qenë qëndrimi”, tha Lushaku-Sadriu.
Edhe Hykmete Bajrami tha se, ndonëse nuk është në dijeni të detajeve të takimit Abdixhiku–Kurti, i duket i drejtë insistimi i kreut të LDK-së që partia të marrë postin e presidentit.
Sipas saj, presidenti do të shërbente si mekanizëm për balancimin e pushteteve dhe do të ofronte më shumë garanci për funksionimin institucional.
“Mendoj se pozita e presidentit do të siguronte një balancim të pushteteve në Kosovë dhe do të ishte një siguresë si për Kosovën, ashtu edhe për Lidhjen Demokratike të Kosovës”, tha Bajrami.
Ajo shtoi se ofrimi i posteve ministrore nga Lëvizja Vetëvendosje, sipas vlerësimit të saj, nuk përbën garanci të mjaftueshme për LDK-në.
Pas takimit të tyre, që zgjati mbi tri orë, Kurti dhe Abdixhiku shprehën qëndrime të ndryshme sa i përket presidentit – moskonsensusi për të cilin muaj më parë mes partive nxiti zgjedhjet e 7 qershorit.
Kurti insistoi se Kosovës i duhet një president konsensual, jopartiak, ndërkaq Abdixhiku tha se president konsensual është kushdo që i merr 80 vota të deputetëve./teve1.info/
