Kështu ka bërë të ditur në një lidhje direkte në emisionin “Ditari” në Tëvë 1 drejtoresha e Shëndetësisë në këtë komunë, Kimete Kuka.
Ajo tregoi se edhe pse kanë mungesë të stafit mjekësor, pacientëve që dyshohet se janë helmuar nga uji i pijshëm në fshatin Gorancë u është dhënë ndihma e duhur.
“Siç është e njohur edhe për Ministrinë e Shëndetësisë, QKMF është me staf të mangët dhe staf të pakët. Me këto kapacitete që i kemi jemi mundu me i bë ballë kësaj situate edhe pse ka qenë stërngarkesë, por besoj në ato mundësitë maksimale janë dhënë për ta menaxhuar situatën me këtë fluks të pacientëve”, tha Kuka.
Sipas saj, dy pacientë janë dërguar për tretman të mëtutjeshëm në Spitalin Rajonal të Ferizajt, ndërkaq simptomat janë të njëjta te të gjithë pacientët.
“Për shkak të fluksit dy pacientë mbrëmë janë orientuar për në QMF në Ferizaj dhe vetëm kanë marrë tretmanet dhe janë kthyer në shtëpi. Simptomat janë diare, vjellje, lodhje, plogështi. Pra siptomat te këta janë të njëjta. Këto janë vetëm dyshimet e qytetarëve që po mendojmë që janë bërë infeksione nga uji por më konkretisht kemi dhënë edhe mostrat e ujit në Institut derisa të vijnë rezultatet më konkrete do të dalim me raport konkret se çka në fakt është gjendja më reale”, shtoi ajo.
Po ashtu si problem tjetër në këtë situatë, Kukaj përmendi edhe mungesën e medikamenteve në QKMF – për çka thotë se kanë marrë mbështetje nga zv.ministri i Shëndetësisë dhe presin të furnizohen Brenda 24-orësh.
“Me kërkesat që i kemi bërë përgjigje nuk kemi marrë por kemi kontaktuar me zv.ministrin që na ka dhënë mbështetje për medikamentet që janë mungesë sepse fluksi ka qenë i madh dhe na kanë dhënë mundësi se do të ofrojnë të paktën për medikamente dhe besojmë që brenda 24 orëve do të furnizohemi me medikamentet që kemi në mungesë”, theksoi ajo./teve1.info/
