Në Gjykatën Themelore në Ferizaj ka nisur seanca e radhës gjyqësore në rastin e vrasjes së rreshterit të Policisë së Kosovës, Muhamet Lika.
Gjashtë të akuzuarit janë sjellë në sallën e gjyqit, ku nga ora 09:00 ka filluar seanca, në të cilën pritet të vazhdojë shqyrtimi gjyqësor ndaj tyre.
Prokuroria Themelore në Ferizaj, Departamenti për Krime të Rënda, më 9 janar të këtij viti ka ngritur aktakuzë ndaj gjashtë personave me inicialet H.B., R.M., V.Ç., E.L., SH.K. dhe D.G.
Sipas aktakuzës, të pandehurit dyshohen se, në bashkëkryerje, më 1 prill 2025 rreth orës 23:00 në Kaçanik, kanë privuar nga jeta rreshterin Muhamet Lika me armë zjarri. Sipas Prokurorisë, vepra është kryer pas përgatitjeve paraprake dhe me përfshirjen edhe të një personi të mitur.
Prokuroria ka kërkuar që, pas administrimit dhe shqyrtimit të të gjitha provave, të pandehurit të shpallen fajtorë dhe të dënohen sipas ligjit. Po ashtu, është kërkuar që masa e paraburgimit ndaj tyre të vazhdojë deri në përfundim të procedurës gjyqësore.
Procesi gjyqësor pritet të vazhdojë me paraqitjen e provave dhe shqyrtimin e çështjes nga trupi gjykues.
