Drejtori i Global Crisis Group, Ilir Kulla, ka deklaruar se nuk përjashton mundësinë që Izraeli të ndërmarrë një tjetër sulm ndaj Iranit në javët e ardhshme, duke e lidhur këtë me zhvillimet politike të brendshme në Izrael.
Në emisionin “Matrix” në Tëvë1, të moderuar nga Mehmet Kalisi, Kulla komentoi edhe deklaratat e kryeministrit izraelit Benjamin Netanyahu lidhur me raportimet për mbështetjen që Kina i ofron Iranit.
Sipas Kullës, Netanyahu ka zgjedhur të mos japë shumë detaje për këtë çështje, pavarësisht insistimit të gazetarëve.
“Kryeministri Netanyahu, në të njëjtën kohë, po mundohet që përmes kompanive izraelite dhe atyre të sigurisë të bashkëpunojë me Kinën dhe të marrë teknologjinë më të avancuar”, ka deklaruar Kulla.
Ai tha se, sipas vlerësimit të tij, Izraeli mund të kryejë një tjetër operacion ushtarak ndaj Iranit.
“Parashikimi im është se në ditët ose javët e ardhshme Izraeli do të bëjë një sulm tjetër, të ngjashëm me atë që nisi luftën me Iranin. Shërbimet izraelite do të mundohen të realizojnë një goditje tjetër kundër Iranit, në mënyrë që kjo t’i shërbejë Netanyahut edhe në aspektin elektoral”, është shprehur Kulla.
Ai shtoi se, sipas tij, as Izraeli dhe as Shtetet e Bashkuara nuk kanë interes të krijojnë përshtypjen se po dalin të humbura nga konflikti.
“Nuk mund të kemi paqe, nuk mund të kemi një marrëveshje vetëm sa për të fituar kohë. As Izraeli dhe as SHBA-ja nuk e kanë luksin të dalin e të deklarojnë se janë humbës nga kjo luftë”, ka thënë Kulla.
