Zëvendëskryeministri i parë dhe ministri në detyrë i Punëve të Jashtme të Kosovës, Glauk Konjufca, i ka dërguar një letër Përfaqësueses së Lartë të Bashkimit Evropian, Kaja Kallas, lidhur me deklaratat e ministres serbe, e cila ka bërë thirrje për spastrim etnik në Kosovë.
Sipas Qeverisë së Kosovës, deklarata të tilla paraqesin retorikë të papranueshme dhe janë në kundërshtim me vlerat evropiane.
Në letrën drejtuar Kallasit, Qeveria e Kosovës ka kërkuar nga Bashkimi Evropian që t’i dënojë qartë dhe publikisht deklaratat e ministres serbe Paunović.
Po ashtu, Kosova ka kërkuar që BE-ja t’ua bëjë të qartë autoriteteve serbe se një gjuhë e tillë është e papranueshme dhe se kjo çështje duhet të trajtohet seriozisht në kuadër të dialogut politik dhe procesit të anëtarësimit të Serbisë në Bashkimin Evropian./teve1.info/
