Agjencia për Parandalimin e Korrupsionit (APK) ka shënuar 20-vjetorin e themelimit duke lansuar platformën Open Data, e cila synon të rrisë transparencën institucionale dhe të lehtësojë qasjen e qytetarëve, mediave dhe shoqërisë civile në të dhënat që posedon agjencia.
Drejtori i agjencisë, Yll Buleshkaj, tha se lansimi i platformës përbën një standard të ri të transparencës për institucionin, duke theksuar se kjo ka qenë një kërkesë e kahershme e shoqërisë civile dhe mediave.
“Si institucion, për herë të parë e lansojmë platformën Open Data. Ka qenë kërkesë e kahmotshme e shoqërisë civile dhe mediave për të pasur qasje më të lehtë te informatat që i posedon agjencia. Sot e shënojmë arritjen e një standardi të ri, për të cilin agjencia është zotuar. Përveç të dhënave të hapura, OJQ të caktuara e mediume mund të kërkojnë qasje. Me kërkesë në agjenci kryhet qasja me afat të caktuar. Është standard i transparencës dhe i agjencisë që lehtëson mjaft shumë të gjithë të interesuarit për të pranuar të dhënat. Edhe për agjencinë kjo do të ndihmojë, pasi do të lehtësojmë nevojën për komunikim. Të dhënat tashmë do të jenë lehtësisht të qasshme dhe të përpunueshme”, tha Buleshkaj.
Se platforma është ndërtuar me teknologjinë më të fundit të Microsoft-it dhe mundëson shkarkimin e deklarimeve të pasurisë në disa formate, tha udhëheqësi i Divizionit të Shërbimeve Informative në APK, Besnik Dragusha.
Ai bëri të ditur se deri më tani, në platformë, për vitin 2026 janë 12 mijë e 700 deklarime, ndërsa nga viti 2023 në total evidentohen 44 mijë e 600 deklarime.
“Platforma është zhvilluar me teknologjinë e fundit të Microsoft-it. Të dhënat në platformën Open Data merren në mënyrë njëkahore të deklarimit të pasurisë. Platforma mundëson shkarkimin e deklarimeve të pasurisë për secilin subjekt deklarues. Shkarkimi i deklarimeve bëhet në tre formate: PDF, Excel dhe file. Në vitin aktual 2026 në platformë ekzistojnë 12 mijë e 791 deklarime, ndërsa në total 44 mijë e 641 deklarime. I kemi të vendosura që nga viti 2023, ndërsa ato më të hershme, nga viti 2011, do të përditësohen. 10 mijë e 767 paraqet numrin e zyrtarëve publikë që janë subjekte deklaruese në Kosovë. Kemi tri gjuhë në të cilat paraqiten të dhënat: shqip, anglisht dhe serbisht”, tha ai.
Ndryshe, mbi 10 mijë e 700 zyrtarë publikë janë subjekte deklaruese në Kosovë.
