Prokuroria Themelore në Gjakovë, përmes Departamentit për Krime të Rënda, ka ngritur aktakuzë ndaj një personi me inicialet E.K., i dyshuar për veprën penale të blerjes, posedimit, shpërndarjes dhe shitjes së paautorizuar të narkotikëve.
Sipas aktakuzës, më 12 shtator 2025, rreth orës 20:15, në rrugën “Gasper Karaqi” në Gjakovë, i pandehuri është ndaluar nga Policia e Kosovës derisa po lëvizte me një motoçikletë të tipit Honda.
Gjatë kontrollit, në çantën e tij janë gjetur nëntë qese plastike me substancë narkotike me peshë 12.82 gram, si dhe 945 euro dhe 2 mijë lekë.
Pas kësaj, policia ka kryer kontroll dhe bastisje në shtëpinë e të pandehurit, ku janë sekuestruar 9,990 euro, 10 franga zvicerane, disa qese me substanca të dyshuara narkotike në formë bari dhe pluhuri, katër peshore digjitale, qese të zbrazëta najloni, gërshërë, thikë dhe një lugë e vogël, të cilat dyshohet se janë përdorur për përgatitjen dhe shpërndarjen e narkotikëve.
Sipas raportit të Agjencisë së Kosovës për Forenzik (AKF), substancat e sekuestruara përmbanin 187.41 gram marihuanë dhe 4.56 gram kokainë.
Me këto veprime, E.K. akuzohet për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, sipas nenit 267, paragrafi 1 të Kodit Penal të Republikës së Kosovës.
Prokurori i rastit i ka propozuar gjykatës që, pas shqyrtimit gjyqësor, i pandehuri të shpallet fajtor dhe të dënohet në përputhje me ligjin./teve1.info/
